Foto: Ashyq derekkóz
Oqý-aǵartý mınıstrliginiń habarlaýynsha, baǵdarlama memlekettik jalpyǵa mindetti mektepke deıingi tárbıe men oqytý standartyna saı ázirlengen jáne mektepke deıingi bilim men bastaýysh bilim arasyndaǵy sabaqtastyqty nyǵaıtýǵa baǵyttalǵan.
«Oqytý merzimi bir aıǵa eseptelgen. Sabaqtar kún saıyn 30 mınýttan, 10 mınýttyq úzilistermen ótedi. Balalarǵa bastaýysh synyptyń bilikti muǵalimderi nemese mektepaldy daıarlyq pedagogteri sabaq beredi. Ásirese, balalardyń fızıkalyq, kommýnıkatıvtik, zııatkerlik, shyǵarmashylyq jáne áleýmettik-emosıonaldyq daǵdylaryn damytýǵa, sondaı-aq mektepke degen oń kózqaras qalyptastyrýǵa basa nazar aýdarylady», dedi mektepke deıingi bilim berý departamentiniń dırektory Manar Adamova.
Aıta keteıik, maýsym men shilde aılarynda baǵdarlamaǵa 25 myńǵa jýyq bala qatysqan. Al tamyz aıynda taǵy 5,3 myń top ashylyp, 65,2 myń balany qamtý josparlanyp otyr. Osylaısha, jaz boıy 90 myńǵa jýyq bala qysqa merzimdi mektepke daıarlyq kýrstarymen qamtylmaq.
