Foto: egemen.kz/ Qyrmyzy Jumaǵalıqyzy
Jıynǵa Ishki ister mınıstri Erjan Sádenov, Densaýlyq saqtaý mınıstri Aqmaral Álnazarova, Oqý-aǵartý mınıstri Ǵanı Beısembaev, Mádenıet jáne aqparat mınıstri Aıda Balaeva, sondaı-aq oblystar men Astana, Almaty, Shymkent qalalarynyń ákimderi, Bas prokýratýra, UQK jáne Qarjy monıtorıngi agenttigi ókilderi qatysty.
Olar esirtki qylmysyna, maskúnemdikke qarsy kúres jónindegi sharalar jáne otbasylyq-turmystyq qatynastar salasyndaǵy quqyq buzýshylyqtardyń aldyn alý boıynsha júrgizilip jatqan jumystardyń tıimdiligin talqylady.
Ishki ister mınıstri Erjan Sádenov jarty jyl ishinde 6,4 tonna esirtki tárkilengenin, 17 myńnan astam esirtki saıty buǵattalǵanyn, 474 esirtki qylmyskeri, onyń ishinde 28 Telegram-kanal ákimshileri ustalǵanyn baıandady. Uıymdasqan qylmystyq toptarǵa qatysty 21 qylmystyq is qozǵalǵan, olardyń úsheýi transulttyq deńgeıdegi toptar ekeni anyqtaldy. Esirtkige qarsy 11 myńnan astam is-shara ótkizilgen. Sonymen qatar esepti kezeńde qoǵamdyq oryndarda ishimdik ishýdiń 107 myń faktisi jáne alkogol aınalymy salasyndaǵy 7 myń zań buzýshylyqtyń joly kesilip, 11 myń adamǵa spırttik ishimdikterdi paıdalanýǵa tyıym salynǵan.
Densaýlyq saqtaý mınıstri Aqmaral Álnazarova aıtqan málimetterge sáıkes, búginde dıspanserlik esepte esirtkige táýeldiligi bar 17 myńnan astam adam tur. Keıingi bes jylda opıoıdqa táýeldiler sany 1,5 ese azaıǵan, kerisinshe sıntetıkalyq stımýlıatorlarǵa jáne esirtkini aralas qoldanýǵa táýeldi bolyp qalǵan pasıentter sany artqan. 2024 jyldyń sońynan bastap táýeldilik sındromy joq biraq esirtkini ózine zııandy túrde tutynatyn adamdarǵa konsýltasııalyq baqylaý engizilgen. Baqylaýdyń bul túrimen búginde 3 myńǵa jýyq adam qamtylǵan. Narkologııalyq kómek 20 óńirlik psıhıkalyq densaýlyq ortalyqtarynda, 79 qalalyq jáne 205 aýdandyq kabınetterde kórsetiledi, sondaı-aq Respýblıkalyq ǵylymı-praktıkalyq psıhıkalyq densaýlyq ortalyǵy jumys istep tur. Medısınalyq-sanıtarlyq alǵashqy kómek deńgeıinde 94 jastardyń densaýlyq ortalyǵy bar, oǵan 2024 jyly 700 myńnan astam adam júgindi. 2025 jyly emdeýdiń tıimdiligin arttyrý boıynsha jańa ádistemelik usynymdar bekitildi. Aýrýhanaǵa jatqyzýǵa qarsy kórsetilimder tizbesin qaıta qaraý jalǵasyp jatyr.
Premer-mınıstr quqyq qorǵaý organdarynyń qansha kúsh salyp jatqanyna qaramastan, nashaqorlyq máselesi, ásirese jastar arasynda saqtalyp otyrǵanyn atap ótti.
«El Prezıdenti Qasym-Jomart Toqaev «Zań men tártip» qaǵıdatyn memleket pen qoǵam qyzmetiniń negizgi postýlattarynyń biri retinde aıqyndap berdi. Sondyqtan da memlekettik organdar, sonyń ishinde quqyq qorǵaý organdary Memleket basshysynyń osy nusqaýy sózsiz oryndalýyn birinshi kezekte qamtamasyz etýge mindetti. Búkil qoǵamdy alańdatyp otyrǵan qaýipti tendensııa – jastar arasynda nashaqorlyqtyń taralýy. О́kinishke qaraı, ol kúnnen kúnge beleń alyp barady. Jaǵdaı ony taratýdyń jańa ádisterimen shıelenise túsýde, olar – ınternet arqyly, poshta arqyly, «jasyryp ketý», ıesi belgisiz elektrondy tólemder. Munyń barlyǵy «narkodıller-ótkizýshi-tutynýshy» úshtiginde fızıkalyq baılanystyń bolmaýyna ákelip otyr. Sol sebepti de qazir taratýshylardy ustaý áldeqaıda qıyn», dedi Oljas Bektenov.
Premer-mınıstr esirtki saýdalaıtyn saıttar men soǵan uqsas habarlandyrýlardy anyqtaý jáne buǵattaý tetikterin jetildire túsý jóninde sharalar qabyldaýdy, esirtki aınalymyna baılanysty aqsha aýdarymdaryn buǵattaý máselelerin pysyqtaýdy tapsyrdy.
Nashaqorlyqty týdyratyn preparattardyń dárihanalyq qozǵalysyn baqylaýdy kúsheıtýge, ońaltý ınfraqurylymyn qurýǵa, onyń ishinde kámeletke tolmaǵandar úshin nashaqorlyqty anyqtaý jáne emdeý jónindegi jumysty jandandyrýǵa nazar aýdaryldy.
