Foto: Ashyq derekkóz
Vıse-premerdiń aıtýynsha, áleýmettik saıasat – bul tek memlekettik shyǵyndardy arttyrý ǵana emes, sonymen qatar halyqtyń densaýlyǵyna, jastardyń bilim alýyna jáne qoǵamnyń turaqtylyǵyn qamtamasyz etýge baǵyttalǵan uzaq merzimdi ınvestısııa.
«Memleket basshysy Úkimet aldyna ómir sapasyn jaqsartý, halyqtyń áljýaz toptaryn qorǵaý jáne áleýmettik ınfraqurylymdy qalyptastyrý jóninde tapsyrmalar bergen bolatyn. Bul baǵytta keshendi jumys atqarylýda. Búgingi tańda memleket óziniń áleýmettik mindettemelerin tolyq oryndaýda. Bıýdjettiń jartysynan kóbi osy salaǵa jumsalady», dedi Ermek Kósherbaev.
Kósherbaev atap ótkendeı, 2024 jyldyń basynan beri 1,2 mıllıon balaly otbasyǵa beriletin járdemaqy 6,5%-ke ósken, bul maqsatqa 870 mıllıard teńge bólingen. Bul ótken jylmen salystyrǵanda 17%-ke kóp.
Sonymen birge, ataýly áleýmettik kómek 245 myń adamǵa taǵaıyndalǵan, olarǵa jalpy somasy 16,2 mlrd teńge tólenip otyr. Kósherbaevtyń aıtýynsha, Prezıdent múmkindigi shekteýli azamattar men zeınetkerlerdi qoldaý máselesine erekshe kóńil bólýdi tapsyrǵan.
«Bıylǵy jyldyń basynan beri zeınetaqy tólemderi 8,5%-ke artty. Qazirgi tańda zeınetaqynyń ortasha kólemi 180 myń teńgeni quraıdy. Bul baǵytta 4 trıllıon teńge kóleminde qarajat bólinip jatyr», dedi ol.
Jalaqyǵa qatysty da jaǵymdy ózgerister bar. Vıse-premerdiń aıtýynsha, eldegi ortasha jalaqy mólsheri 423 myń teńgege jetken. Eń tómengi jalaqynyń ósýi shamamen 600 myń azamattyq qyzmetkerdiń tabysynyń artýyna sebep boldy.
«Jarty jyldyń qorytyndysy boıynsha 250 myń azamat jumyspen qamtyldy. Bul prosester sıfrlyq platformalar arqyly júzege asyrylyp jatyr. Negizgi maqsat – kómekke shyn muqtaj otbasylarǵa naqty qoldaý kórsetý. Bul – Prezıdent tapsyrmasynyń bir baǵyty», dedi Ermek Kósherbaev.
