Foto: Ashyq derekkóz
Eńbek jáne halyqty áleýmettik qorǵaý mınıstrliginiń habarlaýynsha, elimizdi múgedektigi bar adamdardyń jalpy sany 743,9 myń, bul respýblıka halqynyń 3,7 paıyzyn quraıdy. Onyń ishinde 375,7 myń adam eńbekke qabiletti jasta.
«QR Áleýmettik kodeksine sáıkes jergilikti atqarýshy organdar múgedektigi bar adamdar úshin aýyr jumystardaǵy, eńbek jaǵdaılary zııandy, qaýipti jumystardaǵy jumys oryndaryn esepke almaǵanda, jumysshylardyń jalpy sanynyń 2-den 4 %-na deıin (jaldamaly jumyskerlerdiń jalpy sany keminde 50 adam bolǵan kezde) kólemde jumys oryndaryna kvota belgileıdi. Aǵymdaǵy jyldyń 1 toqsanynda kvota boıynsha múgedektigi bar 4,8 myń adam jumysqa ornalastyryldy», delingen habarlamada.
Budan bólek, erekshe qajettilikteri bar azamattar jumyspen qamtýǵa járdemdesýdiń belsendi tetikterine de qatysyp jatyr. Atap aıtqanda:
- 1 shildedegi jaǵdaı boıynsha 1,8 myń adam turaqty jumysqa turdy;
- 141 adam jastar praktıkasyna baǵyttaldy;
- 271 adam áleýmettik jumys oryndaryna ornalasty;
- 3,8 myń adam qoǵamdyq jumystarǵa tartyldy;
- 484 adam «Kúmis jas» jobasy aıasynda jumyspen qamtyldy;
- 28 adam «Alǵashqy jumys orny» jobasyna qatysty;
- 3 adam «Urpaqtar kelisimsharty» jobasy boıynsha jumysqa ornalasty.
Sonymen qatar qysqa merzimdi kásiptik oqytýǵa 88 adam, al kásipkerlik negizderine oqytýǵa arnalǵan «Bastaý bıznes» jobasy boıynsha 2,9 myń adam qatysqan.
«Áleýmettik osal toptarǵa, sonyń ishinde múgedektigi bar azamattarǵa 400 AEK-ke deıingi (1,6 mln teńge) mólsherinde memlekettik granttar berilip jatyr. Búginde 666 adam osyndaı grantqa ıe bolǵan», delingen habarlamada.
Esterińizge sala keteıik, 2018 jyldan bastap halyqaralyq tájirıbeni eskere otyryp, múgedektigi bar adamdar úshin arnaıy jumys oryndaryn qurý shyǵyndaryn jumys berýshilerge óteý (sýbsıdııalaý) tártibi engizilgen. 2025 jyly osy baǵytta 49 arnaıy jumys orny jasaqtalǵan.
