Plenarlyq otyrysta sóılegen sózinde Oljas Bektenov ekologııalyq qaýipsizdik álemdik «jasyl» kún tártibiniń bir bóligi ǵana emes, kez kelgen eldiń ornyqty damýy úshin mańyzdy shart ekenin aıtty.
Elimizde qorshaǵan ortany qorǵaý jónindegi sharalar júıeli túrde qabyldanady. Prezıdent Qasym-Jomart Toqaevtyń tapsyrmasy aıasynda «Taza Qazaqstan» baǵdarlamasy qarqyndy túrde júzege asyrylyp jatyr. Búginde ol aýqymdy ekologııalyq qozǵalysqa jáne otandastarymyzdyń kúndelikti ómiriniń ajyramas bólshegine aınaldy. Tabıǵatqa, týǵan jerge uqypty qaraý mádenıetin qalyptastyrýǵa baǵyttalǵan bul bastama aıasynda tabıǵı aýmaqtardy, sýqoımalarynyń jaǵalaýlaryn tazartý jáne aǵash otyrǵyzý boıynsha ekoaksııalar turaqty túrde uıymdastyrylyp turady.
Sondaı-aq Úkimet ekologııalyq zańnamany jańǵyrtýda, tabıǵat qorǵaý salasyna ozyq tehnologııalardy engizýde, ekologııalyq baqylaýdy sıfrlandyryp jatyr. Bıoalýantúrlilikti qorǵaý qory qurylýda, erekshe qorǵalatyn aýmaqtar jelisi damytylýda, toǵaı buǵysy, qulan, arqar, qaraquıryq jáne qar barysy sııaqty sırek kezdesetin jáne joıylyp bara jatqan janýarlar túrleriniń popýlıasııasy qalpyna keltirilip jatyr. Turan jolbarysy men Prjevalskıı jylqysyn reıntrodýksııalaý jumysy júrgizilip jatyr.
Oljas Bektenov Kaspıı teńizi deńgeıiniń tómendeýine nazar aýdartyp, Kaspıı mańy memleketteri arasyndaǵy aımaqtyq ózara is-qımyldy jandandyrý qajettigin atap ótti.
«2000 jyldardyń basynan beri Kaspıı teńizi deńgeıiniń tómendeý úrdisi baıqalady. Osy jáne ózge de máselelerdi zertteýge Kaspıı teńizi Qazaq ǵylymı-zertteý ınstıtýty quryldy. Ǵalymdardyń boljamdary kóńil kónshitpeıdi. Osynaý biregeı sý aıdynyn saqtap qalý úshin barlyq Kaspıı mańy memleketteriniń batyl úılestirilgen is-qımyly qajet», dedi Premer-mınıstr.
Sý taqyrybyna qatysty sóılegen sózinde Oljas Bektenov Aral mańyndaǵy jaǵdaıǵa da nazar aýdardy. Búginde Qazaqstan Halyqaralyq Araldy qutqarý qoryn basqarady. Elimizde ony qalpyna keltirý jumystary júrgizilýde, Kókaral bógeti nyǵaıtylyp, Syrdarııa saǵasy qaıta qalpyna keltirilip jatyr, balyq salasyn qoldaý jáne burynǵy teńizdiń keýip qalǵan túbin kógaldandyrý boıynsha jobalar iske asyrylyp jatyr.
Premer-mınıstr sondaı-aq muzdyqtardy saqtaýǵa baǵyttalǵan jumystardyń da mańyzdylyǵyn atap ótti. Sarapshylardyń boljamynsha, 2100 jylǵa qaraı Ortalyq Azııa muzdyqtarynyń kólemi aıtarlyqtaı kishireıedi. Osyǵan baılanysty Qazaqstan Prezıdentiniń bastamasymen Er-Rııad sammıtinde muzdyqtardy zertteý jáne qorǵaý boıynsha kúsh-jigerdi biriktiretin «Sý munaralary seriktestigin» qurý usynyldy. Almatyda IýNESKO qamqorlyǵymen qurylyp, óńirlik zertteýlerdiń jetekshi platformasyna aınalǵan Ortalyq Azııa óńirlik glıasıologııalyq ortalyq jumys istep tur.
Bul rette Qazaqstannyń sýqoımalaryn retteýden bastap sýdy esepke alýdy avtomattandyrýǵa deıingi birlesken gıdrotehnıkalyq jobalardy iske asyrýǵa daıyn ekendigi atap ótildi.
Premer-mınıstr forým ótip jatqan orynnyń sımvoldyq mánine de nazar aýdartty. Altaı ólkesi – túrki órkenıetiniń besigi ári mádenı-gýmanıtarlyq ózara áriptestiktiń mańyzdy elementi.
Plenarlyq otyrysqa Reseı Federasııasy Úkimetiniń tóraǵasy Mıhaıl Mıshýstın, Armenııa Premer-mınıstri Nıkol Pashınıan, Belarýs Premer-mınıstri Aleksandr Týrchın, Qyrǵyzstan Premer-mınıstri Adylbek Kasymalıev, Tájikstan Premer-mınıstri Kohır Rasýlzoda, О́zbekstan Premer-mınıstri Abdýlla Arıpov, sondaı-aq Túrikmenstan Mınıstrler kabıneti tóraǵasynyń orynbasary Nokergýly Atagýlyev qatysty. Jıynda Kaspııdiń taıazdanýy, muzdyqtardyń erýi jáne bıoalýantúrlilikti saqtaý máselelerimen qatar qorshaǵan ortany qorǵaý salasynda zamanaýı tehnologııalardy qoldaný, sý resýrstaryn basqarýǵa ınnovasııalyq sheshimderdi engizý jáne transshekaralyq ekotýrızmdi damytý jaıy talqylandy.
