Sýretterdi túsirgen – Erlan OMAR, «EQ»
Tótenshe jaǵdaıǵa saqadaı saılanyp, adam ómirin saqtap qalýda ot pen sýǵa túsýden taıynbaı jedel áreket etetin qutqarýshylardyń, órt sóndirýshilerdiń jumysy jeńil emes. Ásirese tehnogendik, tabıǵı apattarda, kóktemgi sý tasqyny kezinde apat aımaǵyna óńir-óńirden baryp, kómekke umtylǵan qutarýshylaryń isi naǵyz erlik. Qutqarýshy, órt sóndirýshilerge qandaı syı-qurmet kórsetsek te jarasady. Olardyń áleýmettik jaǵdaıy, qaýipsizdigi eshqashan nazardan tys qalmaýǵa tıis. Sala mamandaryna úı, qyzmettik kólik tabystaý rásimine kelgen Tótenshe jaǵdaılar mınıstri, general-maıor Shyńǵys Árinov qutqarýshylardyń áleýmettik jaǵdaıy jyl sanap jaqsara beretinin aıtty.
«Byltyrdan beri qutqarýshylardyń áleýmettik jaǵdaıyna barynsha kóńil bólinip jatyr. Kóptiń tilegimen órt sóndirýshilerdiń turǵyn úı tólemderi máselesi sheshildi. Zańǵa tıisti túzetýler engizildi. Qandaı da bir sebeptermen turǵyn úı tólemin ala almaıtyn qyzmetkerlerdi de kómeksiz qaldyrmaımyz. Mysaly, biz iri qalalarmen qatar, óńirlerde qyzmettik jataqhanalar salýdy oılastyryp otyrmyz. Qazirdiń ózinde Turǵyn úı qory arqyly ýaqytsha páterde turyp jatqan qutqarýshylar bar. Ras, ýaqytsha turýǵa beriletin úılerdiń kóbinde jaǵdaı máz-emes. Biraq biz Turǵyn úı qorymen birge jóndeý jumystaryna kiristik. Búgin baspanaly bolyp jatqan sala qyzmetkerlerin quttyqtaımyn. Munyń barlyǵy Memleket basshysynyń qoldaýymen iske asyp jatqan ıgilikter ekenin atap ótkim keledi», degen Sh.Árinov sala mamandaryna páter, qyzmettik kólik kiltin tapsyrdy.
Úıli bolǵan azamattardyń qatarynda qutqarýshylar, júrgizýshiler, bólimshe komandırleri bar. Nurjan Ámirov 16-órt sóndirý bóliminde júrgizýshi. Salada jumys istep júrgenine 20 jyldan asqan.
«Búgin otbasymyzda úlken mereke. Jyldar boıy armandaǵan baspanaǵa qol jetkizip otyrmyz. О́rt sóndirý qyzmetindegi jumysymyzdy eskerip, mártebemizdi kóterip jatqan áriptesterge, basshylyqqa alǵys aıtamyn. Osy jyldar aralyǵynda sózine de, isine de berik naǵyz myqty qyzmetkerlermen ıyq tirese jumys istedik. О́rt sóndirýshiler aýa raıyna, kún-túnge qaramaıdy. Sýyq aımaqtyń aıazdy kúnderi qar qursaýynan talaı kólikti alyp shyqtyq. Tótenshe jaǵdaıda bir mınýt ýaqytymyzdy joǵaltpaı, jedel jetýge tyrysamyz. Ekiniń biri órt sóndirýshi bola bermeıdi. Saladaǵy áriptesterime amandyq, saýlyq tileımin. Eńbekteri aqtala bersin», dedi
N.Ámirov.
Tótenshelikterdiń ishinde byltyr úıli bolǵandar da bar. Naqtylasaq, byltyr Astana qalasynyń TJD qyzmetkerlerine 50 páter berilipti. Qyzmetkerlerdi túrli baǵdarlama aıasynda nemese ýaqytsha bolsa da turǵyn úımen qamtý jumystary bıyl da jalǵasady. Osy joly 15 qyzmetker úıli bolsa, jyl sońyna deıin taǵy birneshe qutqarýshy, órt sóndirýshige úı tıip qalýǵa tıis.
Úıli bolǵan tótenshelikterdiń biri Serik Esenov eńbek jolyn órt sóndirýshi bolyp bastaǵan. Qazir asa mańyzdy nysandardy qorǵaý bólimin basqarady. Keler jyly zeınetke shyǵatyn merzim de taıap tur. Turǵyn úı – óz isine berilgen mamannyń ǵana emes, otaǵasyna arqa súıeıtin bútin otbasynyń qýanyshy. Saltanatty sátti tamashalaýǵa Seriktiń otbasy, jary Anar Esenova da kelipti.
«Joldasym 9-bólimsheniń komandıri bolyp jumys isteıdi. Eńbek jolyn 2002 jyly qarapaıym órt sóndirýshi bolyp bastaǵan. Otbasyn qurǵanymyzǵa 20 jyl bolypty. Úsh balamyz bar. Búgin otbasymyzben kelip, qýanyshty sátke kýá boldyq. Qutqarýshynyń jary retinde jumys ońaı emesin jaqsy bilemin. Qaýip-qaterden saq júrsin dep kún, meıli tún bolsyn, jumysqa keterde tileýin tilep shyǵaryp salamyz. Sý tasqyny kezinde de apat aımaqtaryna bardy. Osy salada eńbek etip júrgen barlyq mamannyń qýanyshy ortaımasyn, áleýmettik jaǵdaıy jaqsara bersin», deıdi A.Esenova.
Elde bolyp jatqan tosyn oqıǵalar tótenshe jaǵdaılar qyzmetine sapaly, jol talǵamaıtyn kólik qajet ekenin tereń uqtyrady. Ásirese sý tasqyny kezinde qyzmettik kólikter jolda qaldyrmaı, qajetke jarasa jón. Túrli qutqarý operasııasyna jedel jetýge de jańa kólikter aýadaı qajet. Osyny eskere kele Tótenshe jaǵdaılar departamentiniń bólimshelerine Hyundai Tucson, Staria, Toyota Hilux syndy kólikter tapsyryldy.
Kez kelgen tosyn oqıǵada jedel áreket etetin toptyń áleýmettik jaǵdaıy ońalsa, qural-jabdyqtary, tehnıkalary túgendelse, onyń barlyǵy túptiń-túbinde qyzmet kórsetý sapasyna áser etedi.
