Tanysa kele sóıleskenimizde, Gúlzar ataqty ánshi Igilik Omarovtyń nemeresi bolyp shyqty. Ákesi Ǵabdrahman bir kezderi Jańaarqa aýdanyn basqarǵany esimizge tústi. Qazir Amerıkada ónerin shyńdap júrgen Gúlzardyń ol jaqtaǵy laqap aty Gúlzar Gabman, áleýmettik jelilerden de osylaı izdese shyǵady.
Ánshi 2022 jyly «Viva-Music Carnigie Hall» baıqaýyna qatysyp, birinshi orynnan kórinip, jeńimpaz tanylsa kerek. Onda halyq aýzynda keń taralǵan Úlebaıdyń «Dýdaraıyn» quıqyljytqan eken. Sodan beri úsh jyl ótkende Gúlzar ataqty sahnaǵa qaıta kóterilip otyr. Bul jolǵy qurmettiń orny bólek. Sebebi men degen álemdik sahnagerlerdiń mańdaıyna jazyla bermegen konsert zalynyń ujymy men atalǵan baıqaýdy uıymdastyrýshy tarap ánshini attaı qalap, qurmetti qonaq retinde shaqyryp, bir emes, eki birdeı qazaq ánine oryn berip otyr. Gúlzar shyrqamaı qalsyn ba? Bul joly halyq áni «Ágýgaı» men el arasyna Igilik Omarovtyń oryndaýynda keń taralǵan Sadyq Kerimbaevtyń áni «Aqerkeni» oryndapty. «Bıtlz» toby, Laıza Mınnellı, Frenk Sınatra, Andrea Bochellı, Marııa Kallas syndy álemdik juldyzdar óner kórsetken zalda qazaq qyzynyń án shyrqaýy, árıne, tarıhı oqıǵa der edik. Muny ózi de osylaı shamalap otyrǵanyn aıtady ánshi.
«Meni qoldap, qoshemettep kelgen osyndaǵy Qazaq qaýymdastyǵy ókilderine alǵysym sheksiz» deıdi Gúlzar Ǵabdrahman.
