CLIP baıqaýy – álemniń túrli elderinen 32 jasqa deıingi asa talantty opera ánshileri ǵana baq synaıtyn óte bedeldi jarys. 2015 jyldan beri turaqty uıymdastyrylyp keledi.
Qazylar alqasy quramynda – Mılan qalasyndaǵy La Scala, Monte-Karlodaǵy Opera, Býenos-Aırestegi Kolon teatry, Madrıdtegi Korol teatry, Vısbaden memlekettik teatry syndy tanymal óner ordalarynyń basshylary tórelik jasaǵan bul jolǵy óner saıysyna álemniń 50-den astam memleketinen 200-den asa ánshi qatysqan eken.
Osylardyń ishinen 92 vokalıst tikeleı tyńdaýǵa shaqyrylyp, jartylaı fınalǵa 22 qatysýshy ótken kórinedi. Al fınaldyq kezeńge tek 10 úzdik vokalıst joldama alǵan. Áıgerim sol úzdikterdiń arasynan sýyrylyp shyǵyp, bas júldesin ıelendi.
Ánshi qyzymyz ınstagram paraqshasyna: «Bul men úshin erekshe tájirıbe boldy. Aldaǵy ýaqytta budan da úlken asýlardy baǵyndyram degen senimdemin», dep jazsa, «Atalǵan baıqaýdyń halyqaralyq opera ónerinde orny óte zor ekenin eskersek, mundaı deńgeıdegi jeńis – úlken jetistik» deıdi otandyq mamandar.
Qazirgi tańda halyqaralyq deńgeıde qazaq atyn shyǵaryp júrgen qaryndasymyz 1996 jyly qaımaǵy buzylmaǵan Qyzylorda oblysynyń Qarmaqshy aýdany Turmaǵambet aýylynda týǵan. Jasynan án ónerine yntasy oıanǵan ol 2012 jyly oblys ortalyǵynda ornalasqan Qazanǵap atyndaǵy mýzykalyq kolledjge oqýǵa túsip, kásibı ánshilik jolyn bastaǵan.
Keıin elordadaǵy Qazaq ulttyq óner akademııasynda bilimin jetildirip, talantynyń arqasynda álemdegi eń bedeldi opera mektebi – Italııadaǵy «La Skala» teatr akademııasynda taǵylymdamadan ótipti.
«Opera ánshisi Áıgerim Altynbek – kóptegen halyqaralyq vokaldyq baıqaýdyń laýreaty. Ol tanymal kompozıtor Djakomo Pýchchınıdiń 100 jyldyǵyna oraı uıymdastyrylǵan halyqaralyq opera ánshileri baıqaýynda jeńimpaz atandy. Sonymen qatar Italııanyń Modena qalasynda ótken Nıkolaı Gıaýrov atyndaǵy opera ánshileriniń halyqaralyq baıqaýynda úshinshi oryn ıelendi. Qazaq ánshisi ataqty ıtalııalyq opera ánshisi Mırella Frenıdiń arnaıy syılyǵyn aldy. Álemniń 470 ánshisi qatysqan Renata Tebaldı atyndaǵy halyqaralyq vokal konkýrsynda ekinshi orynǵa ıe boldy», dep habarlaıdy Mádenıet jáne aqparat mınıstrliginiń baspasóz qyzmeti.
Osy ýaqytqa deıin respýblıkalyq jáne halyqaralyq deńgeıdegi birqatar vokaldyq baıqaýlarda aldyńǵy oryndardan kórinip, elimizdiń atyn álemdik sahnada tanytyp kele jatqan Áıgerim Altynbekqyzynyń árbir jetistigi – elimizdiń mádenıet pen óner salasyndaǵy bedelin arttyra túseri sózsiz. Talantty óner ıesin osy jarqyn jetistigimen shyn júrekten quttyqtap, shyǵarmashylyq tabys pen tolaǵaı jeńister tileımiz.
