2023 jyly Qazaqstan halqy Assambleıasynyń jastar qanaty belsendileriniń bastamasymen qurylǵan jas teatr Shyǵys Qazaqstanda ǵana emes, elimizdiń birqatar óńirinde aıryqsha shyǵarmashylyq bastamasymen tanylyp keledi.
«Qutqar meni» qoıylymy – jastar arasynda keń taralǵan nashaqorlyq pen qumar oıyndarǵa táýeldilik (lýdomanııa) sekildi kúıip turǵan máselelerdi arqaý etken áleýmettik-dramalyq týyndy. Trýppanyń basym bóligi órimdeı jastar bolǵanymen, kótergen máselesiniń júgi aýyr. Jas kúninde aıaǵyn shalys basyp, nashaqorǵa aınalyp, mańdaıyn taý men tasqa soǵyp ókingen keıipkerler kórermender kózine eriksiz jas toltyrdy. Sondyqtan da bolar, qaıta-qaıta uzaq qol shapalaqtap, qoshemet kórsetkeni – jas trýppanyń sheber eńbeginiń baǵasy der edik.
– Jastardy nashaqorlyqtan saqtap, tárbıelik máni zor dúnıe bolsyn dep osy spektakldi dúnıege ákeldik. Akterlik quram – jasóspirimder men jastardan jasaqtalǵan. Áleýmettik ortada ne bolyp jatqanyn kópshilik bile bermeıdi. Sol shyndyqty kórermenge teatr arqyly jetkizgimiz keldi,– deıdi «Assambleıa jastary» teatrynyń kórkemdik jetekshisi Úkilaı Turarbek.
Teatr ujymy ónegeli qoıylym arqyly qoǵamdaǵy áleýmettik máselelerge nazar aýdartyp, jastardyń jaýapkershilik sezimin qalyptastyrýdy, áleýmettik ortada moraldyq-etıkalyq normalardy nasıhattaýdy murat tutqan. Rasynda, esirtkiniń kesirinen talaı jastyń ómiri óksip, qurdymǵa ketip júrgeni jalǵan emes. Keıbiri ómirin erte aıaqtasa, keıbiri ómirlik kúntizbesin aıqyndaı almaı kúızeliske túsedi.
Aıta keteıik, teatr ujymy aldaǵy ýaqytta da eleýli qoıylymdarymen kópshilik aldyna shyǵýdy josparlap otyr.
