Quqyq qorǵaý organdary qoǵamdyq oryndarda adamnyń túr-sıpatyn anyqtaýǵa kedergi keltiretin kıim elementterin kııýge tyıym salý jónindegi zańnamaǵa engizilgen ózgerister boıynsha halyq arasynda túsindirý jumystaryn júrgizip jatyr. Atalǵan tyıym Qazaqstan Respýblıkasynyń "Quqyq buzýshylyqtyń aldyn alý týraly" zańyna engizilgen ózgerister arqyly zańmen bekitildi. Bul norma qoǵamdyq qaýipsizdikti qamtamasyz etý sharalaryn kúsheıtýge baǵyttalǵan.
Sonyń ishinde adamnyń tulǵasyn sáıkestendirý – quqyq buzýshylyqtyń aldyn alýda da, qylmysty ashýda da asa mańyzdy prosess. Polısııa qyzmetkerleri turǵyndarǵa bul tyıym tek betti tolyqtaı jaýyp turatyn kıimderge ǵana qatysty ekenin túsindirýde.
Al júzdi jappaıtyn dinı kıimder bul tyıym aıasynda qarastyrylmaıdy. Sonymen qatar bul shekteý aýa raıynyń erekshelikterine, medısınalyq kórsetkishterge baılanysty jáne zań talaptaryna sáıkes qyzmettik, eńbek mindetterin oryndaý úshin, azamattyq qorǵaý maqsatynda, sondaı-aq sporttyq nemese mádenı-kópshilik is-sharalarǵa qatysý barysynda bet jabýǵa májbúr bolǵan jaǵdaılarǵa qoldanylmaıdy.
Polısııa qyzmetkerleri qabyldanyp jatqan sharalar azamattardyń quqyǵy men bostandyǵyn, onyń ishinde dinı senim bostandyǵyn shekteýge emes, tek qana qoǵamdyq tártip pen qaýipsizdikti nyǵaıtýǵa baǵyttalǵanyn erekshe atap ótedi.
