Foto: climtech.kz
Búginde ǵımarattardy jeldetý, kondısıonerleý júıesi qurylystyń mańyzdy bólshegine aınalǵan. Bul júıe ǵımarat ishindegi aýany tazartyp, qajetti mólsherde jańa aýamen oryn toltyrady ári ylǵaldy retteıdi. «BAZIS-A» kompanııasynyń jeldetý ýchaskesiniń bastyǵy Alekseı Nıkıshın zamanaýı keńse, turǵyn úı jáne óndiris oryndarynda, kondısıonerleý júıesi jaılylyq pen qaýipsizdiktiń negizgi kepili ekenin atap ótti. О́miriniń 25 jylyn jeldetý jáne kondısıonerleý júıelerine arnap kele jatqan maman tańdaǵan kásibı baǵytyna bir sát te kúmán keltirmegen.
«Bizdiń otbasymyzda jumysshy mamandarǵa qurmet ejelden erekshe. Sebebi anam – qurylysshy, ákem – júrgizýshi bolyp ter tókti. Eńbek qadirin jastaıymyzdan uǵyp óstik. Áke-sheshem jumystan sharshap kelse de, shańyraqqa kúlip enetin. Osy ádemi ádet meniń boıyma sińirildi. Sondyqtan jeldetý salasynda eńbek ete júrip, mundaı qyzmetti biz atqarmasaq, kim eńseredi dep oılaımyn», deıdi Alekseı Anatolevıch.
Keıipkerimizdiń aıtýynsha, jumystyń eń kúrdeli bóligi – bastapqy kezeń, ıaǵnı joba kelgen sát. Sol kezde qujattardy muqııat zerttep, qandaı jumystar atqarylatynyn, qandaı jabdyq qajet bolatynyn anyqtaıdy.
«Biz jobalyq qujattamamen egjeı-tegjeıli tanysamyz. Jobalaý ınstıtýtymen yqtımal kedergilerdi talqylaımyz, qajet bolsa ózgerister engizemiz. Tek sodan keıin ǵana montajǵa kirisemiz. Men qazirgi komandammen 20 jyldan asa birge jumys istep kele jatyrmyn. Eger jeldetý arnalary durys tóselmese, júıe múlde jumys istemeıdi. Bul, ásirese adamdar men tehnıka kóp shoǵyrlanǵan kásiporyndar úshin asa qaýipti. О́ıtkeni sapaly jeldetý – ómirlik mańyzy bar talap. Jazda – ystyq, qysta – sýyq bolyp, qajetti mólsherde taza aýa kelmese eńbek ónimdiligi tómendep qana qoımaı adam densaýlyǵyna zarar keltirýi múmkin. Sondyqtan zamanaýı ǵımarattardaǵy jeldetý júıesi – jaı qosymsha emes, jaıly ári qaýipsiz orta úshin mindetti shart», deıdi Alekseı Nıkıshın.
Al búginde áke izin basqan Kırılldiń negizgi meńgergen mamandyǵy – baǵdarlamashy. Onyń salaǵa aıaq basýy qyzyq oqıǵamen astasyp jatyr. Birde ol ákesine qolǵabys jasaý úshin qurylys nysanyna baryp, birjolata sol salada qalýdy sheshken. Osylaısha Kırıll kondısıonerleý júıesi salasynda 10 jyldan beri qyzmet etip júr.
«Baǵdarlamashy jumysyn kompıýter aldynda tapjylmaı otyryp atqarady. Al jeldetý júıesin belsendi qımyldap ornatasyń. Adamdarmen tyǵyz qarym-qatynas qurasyń. Maǵan qazirgi mamandyǵymnyń osy tusy qolaıly boldy. Men jumysymdy aýystyrý nıetimdi ákeme aıtqanda birden qoldaý tanytty. Sol sátten ákem bilgenimen bólisip, árdaıym kómek kórsetedi. Bul qoldaý otbasymda da, jumysta da mańyzdy», deıdi Kırıll Aleksıevıch.
Alekseı Nıkıshın endi shákirt tárbıeleýge den qoıǵan. Ol úshin mańyzdysy tájirıbesimen bólisip, sala kókjıegin keńeıtý.
