Aldymen qazaq kúresi týraly bir aýyz sóz aıta ketelik. Kúres tarıhy tereńde jatyr. Altaıdan Atyraýǵa deıingi ıen dalany jaılap, attyń jalynda, túıeniń qomynda kún keshken ata-babamyz bas qosqan as-toılardy kúressiz ótkizgen emes. Qarsylasynan kúshi basym túsip, jeńiske jetken balýandardy ejelden erlik pen órlikti qurmet tutatyn halyq tóbesine kóterer edi. Qazaqtyń has batyry Qajymuqan atamyzdyń esimi tól tarıhymyzǵa ǵana enip qoıǵan joq, sonymen birge sportshylardyń álemdik elıtasynyń qataryna qosyldy. Qazaq kúresi boıynsha eń iri jarys 1938 jyly spartakıdada ótkizilgen eken. Sol kúnnen bastap turaqty uıymdastyrylýda.
Bizdiń keıipkerimiz Áset balalyqtyń áserimen ózge de sport túrlerimen aınalysty. Biraq, negizgi baǵyt qazaqsha kúreske keri áseri tıgen joq, qaıta sharbolattaı shyńdala tústi. 2023 jyly Jalǵyzqudyq aýylynda ótkizilgen oblystyq týrnırde eki kúmis júldege ıe boldy. Osylaısha bala balýannyń aldynan dańǵyl jol ashyla bastady. Astana jáne Taraz qalasynda ótken Qazaqstan Respýblıkasy chempıonatyna qatysty oblystyq, aýdandyq jarystarda júldesiz qalǵan emes.
2024 jyly Áset Qyrǵyzstanda ótken álem chempıonatynda kúmis jáne qola júldege ıe boldy. 2025 jyly О́zbekstanda juldyzdaı jarqyrap kórindi, álem chempıony atandy.
Áset balýan ǵana emes sabaǵyn da jaqsy oqıdy. Pán olımpıadalaryna úzbeı qatysady. Qasyndaǵy jora-joldastaryna qol ushyn berip, kómek kórsetedi. Negizinde shyn myqty meılinshe qarapaıym ári adamgershilik qasıetterge ıe bolýy kerek.
–Meniń boz kilemdegi tabysyma jattyqtyrýshym Halıbek Saltanattyń qosqan úlesi kóp, – deıdi Ásettiń ózi.
Boz balanyń tabysyna jerlesteri únemi qýanyp otyrady. Aýyldastarynyń aty ozǵany olarǵa da mereı.
Aqmola oblysy
