Hakimniń aqyn shákirtteriniń biri – Kókbaı Janataıulynyń jas kezi eken. Ol ustaz-dosy Abaı Qunanbaıulyna bir jaǵy ázil, ekinshi jaǵy qaǵytpa óleń aıtqysy kelip, bylaı depti:
«Júrisim turysymnyń bári Abaısha,
Abaıdan kem bolamyn men qalaısha,
Kóp zakon, az ǵana aqyl ózimde bar,
Ashylyp kókiregim keń saraısha».
Hakim jaryqtyq shákirtiniń sóz saptaýyna rıza bolyp, bir kúlip alyp:
«Men bolamyn demeńder,
Aıaqty alshań basqanǵa,
Eki kózińdi alartyp,
Qur qaraısyń aspanǵa,
Bir ǵylymnan basqanyń,
Bári kesel asqanǵa,
О́ıtken adam jolyǵar,
Keshikpeı-aq nuqsanǵa».
Bul qaǵytpany gazetke usynǵan – ataqty abaıtanýshy Qaıym Muhamedhanov eken. Gazette jarııalanǵan nusqanyń sońyna avtor buny «Kókbaıdyń balasynyń aýzynan jazyp aldym» dep anyqtama beripti.
Jalpy, Abaı murasyn jınaý isinde Qaıym Muhamedhanovtyń eńbegi eren. 2010 jyly Semeı qalasynda jaryq kórgen «Tarta kór, Semeıimniń topyraǵy» atty kitaptyń 5-betinde: «Qaıym Muhamedhanov 1940 jyldary Abaıdyń buryn belgisiz bolyp kelgen 9 óleńin tapty. Olar 1945 jyly jaryq kórgen aqyn shyǵarmalarynyń tolyq jınaǵyna endi» dep jazylypty. Joǵaryda tabylǵan toǵyz óleńniń biri osy «qaǵytpa» ekeni anyq.
