«Bilim sapasyn jaqsarta túsý qajet. Qazir ǵylym men bilim, tehnologııa óte jyldam ózgerip jatyr. Keshe alǵan bilimiń erteń ózekti bolmaı qalýy múmkin. Sondyqtan muǵalimniń bilikti bolýy – óte mańyzdy másele. Joǵary oqý ornynda alǵan bilimmen shektelip qalýǵa bolmaıtyny túsinikti», dedi Prezıdent.
Sonymen qatar Memleket basshysy ustazdardyń balalardyń oqýǵa zeıinin ashatyn ádis-tásilderdi jetik meńgerý kerektigin aıtty.
«Damyǵan memleketterde bilim berý salasy ulttyq ekonomıkanyń tiregi, qozǵaýshy kúshi ekeni belgili. Sondaı elderdiń tájirıbesin zerttegen jón.Biraq basqalardyń bala oqytý úlgisin qur kóshirip ákele salýǵa da bolmaıdy. Ozyq tájirıbeni úırenip, ony elimizdiń bolmysyna beıimdeý kerek. Jalpy, bilim berý standarttaryna, oqytý ádistemesine, oqýlyqqa engiziletin kez kelgen ózgeristi óte muqııat saralaý qajet. Sebebi, bilim salasynda eshqandaı qatelikke jol berýge bolmaıdy. Bir ǵana qateliktiń saldary óte aýyr bolýy múmkin», dedi Qasym-jomart Toqaev.
Buǵan qosa, Prezıdent qala jáne aýyl mektebindegi bilim berý deńgeıin teńestirýdi mańyzdy mindet retinde atady.
«Sońǵy tórt jylda 4 myńnan astam aýyl mektebiniń materıaldyq-tehnıkalyq qory jańǵyrtyldy. Onyń basym kópshiligi – aýyl mektepteri. Aýyldaǵy bilim oshaqtaryna kúrdeli jóndeý júrgizilip, jańadan kitaphanalar, ashanalar men sport zaldary salynyp jatyr. Bul jumys aldaǵy ýaqytta da jalǵasyn tabady. Balanyń bári – birdeı. Aýyl balasy men qala balasynyń bilim alý múmkindigi de birdeı bolýy kerek. «Keleshek mektepteri» jobasynyń negizgi maqsaty da – osy», dedi Memleket basshysy.
