Oblystyq týrızm basqarmasynyń basshysy Nurdáýlet Medeýovtiń málimdeýinshe, jyl basynan beri týrızm salasyndaǵy qyzmet kólemi 1,5 mlrd teńgeni qurap, ótken jyldyń tıisti kezeńinen 1,3%-ǵa ósken. Sheteldik týrısterdiń sany da ótken jyldyń tıisti kezeńderimen salystyrǵanda 2 esege artyp otyr.
«E-qonaq» júıesine sáıkes, qańtar-maýsym aılarynda óńirge kelgen sheteldikterdiń sany 24 myńǵa jýyqtapty. «Qytaı, Japonııa, Italııa, Germanııa elderinen kelgen týrısterdiń sany artyp keledi. Halyqaralyq BAQ-ta Túrkistan týraly keńinen aqparattar taratylyp, óńirdiń týrıstik áleýeti tanystyrylyp keledi. Shaharda jyl sońyna deıin eskek esý kanaly iske qosylmaq. Sonymen qatar, qolónershiler qalashyǵy da bıyl aıaqtalady dep kútilýde. Kúltóbe qalashyǵy jobasyn da jaqynda iske qosý josparlanyp otyr. Bıyl jalpy 27 ınvestısııalyq joba júzege asyrylady. Bul jobalarǵa 26,3 mlrd teńge kóleminde ınvestısııa tartylyp, 1 130 jańa jumys orny ashylady dep josparlanýda. Sonymen qatar, týrıstik ınfraqurylym salasynda 11,3 mlrd teńge kólemindegi 6 joba iske asyrylmaq. Jyl sońyna qaraı Túrkistan oblysyna keletin týrıster sany 350 myń adamǵa jetedi dep kútilýde. Jalpy saladaǵy ınvestısııa kólemin 55,8 mlrd teńgege jetkizý mejelenip otyr», dedi basqarma basshysy.
Sondaı-aq óńirde qonaq úılerdiń sany 245-ke, demalys oryndary 298-ge jáne emdik-saýyqtyrý keshenderiniń sany 117-ge jetti. Bıyldyń I toqsany boıynsha qonaq úılerge jaıǵasqan týrıster sany 61,3 myń adamǵa jetip, ótken jyldyń tıisti kezeńinen 1,5%-ǵa ósken.
