Erkin kúres. Dáýlet Nııazbekov – Azııa chempıony!

ASTANA. 8 mamyr. Katar astanasy – Dohada kúres túrlerinen Azııa chempıonaty ótýde. Osy saıysta erkin kúresten qazaq palýany Dáýlet Nııazbekov (61 kg.) qurlyq chempıony atandy. Bul – Dáýlettiń atalǵan jarystaǵy alǵashqy «altyny». Osyǵan deıin ol eki márte Azııa chempıonatynyń qola júldegeri atanǵan edi (Delı, Úndistan, 2013 j., Astana, Qazaqstan, 2014 j.). Bul týraly egemen.kz habarlady. Otandasymyz alǵashqy beldesýinde Pákstan senim artqan Hýsseın Mýdassardy jeńdi (2:0). Ekinshi kezdesýde qyrǵyzstandyq palýan Ádil Mamataevty 9:0 esebimen tize búktirdi. Jartylaı fınalda Mońǵolııanyń Nomın Batbold esimdi palýanynan basym tústi (15:10). Al fınalda Iran myqtysy Behnam Ehsanpýrden aılasyn asyrdy. Nátıjesinde atalǵan jarysta Qazaqstan qorjynyna alǵashqy altyn medaldi saldy. Buǵan deıin Dohadaǵy saıysta áıelder kúresinen Tatıana Amanjolova (48 kg.) qola júldege qol jetkizgen bolatyn. Sheshýshi synda ol mońǵolııalyq Bıambazaı Sogbaatardy jeńdi. Sondaı-aq, erkin kúresten taǵy eki palýanymyz qola júldege talasqan eli. Alaıda, ekeýi de qarsylastaryna ese jiberdi. Olar: Jiger Zakırov (74 kg.) pen Álıhan Jumaev (97 kg.). Jiger Úndistan palýanyna jol berse, Álıhan japonııalyqtan jeńildi. Aıta keteıik, kúres túrlerinen Azııa chempıonaty 6 mamyrda bastaldy. Qurlyqtyq dodaǵa Azııanyń 26 elinen 340-tan astam palýan qatysýda. Jarys 10 mamyrǵa deıin jalǵasady. Elaman Qońyr. Derek: egemen.kz. Sýret: yka.kz.