Foto: Májilistiń baspasóz qyzmeti
Jergilikti turǵyndarmen kezdesýden soń Iýlııa Kýchınskaıa ortalyq jáne jergilikti atqarýshy organdar ókilderiniń qatysýymen Aqmola oblysyndaǵy sýmen jabdyqtaý máselelerine arnalǵan keńes ótkizdi. 2025 jyldyń sońyna deıin halyqty sapaly aýyz sýmen qamtamasyz etý – Memleket basshysy men «AMANAT» partııasynyń saılaýaldy baǵdarlamasyndaǵy basty mindettiń biri.
«Sapaly aýyz sýǵa qol jetkizý – árbir azamattyń zańdy quqyǵy, bul artyqshylyq emes, ómirlik qajettilik. Egindikól aýdanynda kóp jyldan beri qordalanǵan másele partııamyz ben memlekettik organdardyń júıeli jumysynyń arqasynda sheshimin tabýda. Bizdiń basty mindetimiz – máseleni ýaqtyly sheship, árbir aýyl men árbir úıdi sapaly aýyz sýmen qamtamasyz etý», dedi depýtat.
Oblystyń úsh aýdanyn aýyz sýmen qamtyp otyrǵan Nura toptyq sý qubyrynyń jaı-kúıine erekshe nazar aýdaryldy. Bul nysan jyldar boıy halyqty ábigerge salǵan basty máseleniń biri bolyp otyr. Turǵyndardyń «AMANAT» partııasyna jasaǵan ótinishinen keıin qubyrdyń qaıta jańǵyrtylýy erekshe baqylaýǵa alyndy. 2023 jyly aýqymdy jumys qolǵa alynyp, 2024 jyldyń shildesinde onyń mańyzdy kezeńi aıaqtaldy. Nátıjesinde Sabyndy aýylynan Egindikólge deıingi 68,5 shaqyrymdyq bólik qaıta qalpyna keltirildi. Bul aýdannyń edáýir bóligin sýmen qamtýǵa múmkindik berdi.
Bıylǵy jyly sý nysandaryn jóndeýge, sorǵylardy, ysyrmalardy jáne sý ótkizetin qubyrlardy aýystyrýǵa, eseptegish quraldardy ornatýǵa qarajat bólindi. Egindikól jáne Poltavka aýyldarynda sý munaralary jóndelmek. Al Abaı, Juldyz jáne Jalmanqulaq aýyldarynda sýdy tazartýǵa arnalǵan blok-modýlder ornatylady. Bul sharalar halyqqa sanıtarlyq talaptarǵa saı qaýipsiz aýyzsý jetkizýge múmkindik beredi.
2025 jyly keminde 80 aýyldy aýyz sýmen qamtý josparlanǵan. Osylaısha jalpy sany 148 aýyl taza aýyz sýǵa qol jetkizetin bolady. Sonymen qatar Kókshetaý, Qosshy, Makınsk jáne Ereımentaý qalalarynda jáne aýyldyq okrýgterde jobalar iske asyrylýda. Bul jumystarǵa respýblıkalyq bıýdjetten, arnaıy memlekettik qordan jáne oblystyq bıýdjetten qarjy bólingen. Tek 2024–2025 jyldary ártúrli qarjy kózderinen 20 mlrd teńgeden astam qarajat qarastyryldy. Qazirgi tańda Aqmola oblysynda ortalyqtandyrylǵan sýmen qamtýdyń kórsetkishi qalalarda – 99%, aýyldarda – 96,6%-dy qurap otyr.
Aıta keteıik, jýyrda qabyldanǵan Sý kodeksin ázirleýge Májilistegi «AMANAT» partııasy fraksııasynyń depýtattary bastamashy boldy. Kodeks sý sharýashylyǵy keshenin jańǵyrtýdy, resýrstardy tıimdi paıdalanýdy jáne barlyq qazaqstandyqtardy sapaly aýyz sýmen qamtamasyz etýdi kózdeıdi. Sondaı-aq qujat qosymsha baqylaý tetikterin engizip, jumystyń belgilengen ýaqytynda aıaqtalmaýy men sapasyz oryndalýy úshin laýazymdy tulǵalardyń jaýapkershiligin kúsheıtedi.
