Ashat Hasenovtiń aıtýynsha, «QazMunaıGaz» geologııalyq barlaý jumystaryn belsendi júrgizip keledi. Bıyl qoldanystaǵy ken oryndaryn qosymsha barlaý úshin jeti uńǵymany burǵylaý josparlanyp otyr. Onyń úsheýi burǵylandy.
Qytaıdyń CNOOC kompanııasy alǵash ret elimizdegi geologııalyq barlaý isine qarjy quıýǵa sheshim qabyldady.
Sondaı-aq Sinopec kompanııasy Qazaqstanǵa qomaqty ınvestısııa salýǵa nıetti. Shell, Chevron, British Petroleum transulttyq korporasııalary Atyraý, Aqtóbe jáne Mańǵystaý óńirlerindegi ýchaskelerdi jan-jaqty zertteýde.
Prezıdentke sońǵy 7 aıda munaı men kondensat óndirisiniń kólemi 15,3 mıllıon tonnany quraǵany týraly baıandaldy. Bul 2024 jyldyń osy kezeńimen salystyrǵanda 9 paıyzǵa joǵary. Al tabıǵı jáne ilespe gazdy óndirý kólemi 6,7 mıllıard tekshe metrge jetti, ıaǵnı byltyrǵy jyldyń kórsetkishinen 19 paıyzǵa artyq. Batys Prorva (Atyraý oblysy), О́riktaý (Aqtóbe oblysy), Rojkov (Batys Qazaqstan oblysy) ken oryndarynda gaz óńdeý kólemin ulǵaıtý jobalary júzege asyrylyp jatyr.
Memleket basshysyna munaı tasymaldaý kólemi 49 mıllıon tonnany quraǵany týraly málimet berildi. Qosymsha tasymaldaý baǵyttaryn damytý jumystary qolǵa alyndy: jeti aıda Ázerbaıjan baǵytyna 0,9 mıllıon tonna, Germanııaǵa 1,1 mıllıon tonna munaı tasymaldandy. Majarstanǵa 85 myń tonna kóleminde Qazaqstan munaıynyń alǵashqy partııasy jetkizildi.
Bıyl otandyq munaı óńdeý zaýyttarynda 10,4 mıllıon tonna munaı óńdeldi. Sonyń ishinde janar-jaǵarmaı óndirisi 7,8 mıllıon tonnaǵa jetip, 936 myń tonnaǵa ulǵaıdy. Bul – rekordtyq kórsetkish.
Ashat Hasenov Mańǵystaý oblysyndaǵy Kendirli zaýytynda tushytylǵan teńiz sýy Jańaózen qalasynyń sý taratý jelisine jiberile bastaǵanyn aıtty. Budan bólek, qýaty 247 MVt bolatyn gıbrıdti elektr stansasynyń qurylysy júrip jatyr. Jylyna 1 mln 250 myń tonna ónim shyǵaratyn polıetılen zaýyty boı kóterýde. Joba quny – 7,4 mıllıard dollar.
Sonymen qatar Prezıdentke óńirlerde júzege asyrylyp jatqan áleýmettik jobalar tanystyryldy.
Kezdesý sońynda Memleket basshysy geologııalyq barlaý jáne iri ınvestısııalyq bastamalardy iske asyrý boıynsha júıeli jumysty jalǵastyrýdy tapsyrdy.
