Jaǵalaýdaǵy provınsııalarda 587 myń adamdy evakýasııalaý jospary daıyndaldy. Keıbir aımaqtarda turǵyndarǵa 25 tamyzda tańǵy saǵat 7:00-den bastap úılerinen shyǵýǵa tyıym salynady.
Tabıǵı apat kólik qatynasyn toqtatty: áýejaılar jumysy toqtatylyp, poıyzdar keshiktirildi, avtojoldardaǵy qozǵalys shekteldi. Balyqshylarǵa teńizge shyǵýǵa tyıym salyndy.
Sınoptıkterdiń dereginshe, birqatar aımaqta jaýyn-shashyn mólsheri 150–250 mm-ge, keı jerlerde 600 mm-ge deıin jetýi múmkin. Jeldiń ekpini saǵatyna 166 shaqyrymǵa deıin kúsheıedi. Degenmen, eldiń ishki bóligine jyljyǵan saıyn daýyl birtindep álsireıdi.
Mınıstrlikterge, provınsııalyq bılikke jáne áskerı qurylymdarǵa halyqty evakýasııalaý, bógetter men sý qoımalaryn nyǵaıtý, baılanys jelileriniń úzdiksiz jumysyn qamtamasyz etý tapsyryldy. Vetnam Syrtqy ister mınıstrligi Qytaı men Fılıppın elshilikterine hat joldap, vetnamdyq balyqshylar men daýyldan jasyrynǵan kemelerge kómek kórsetýdi surady.
Vetnam halyq armııasyna jergilikti bılikpen birlese qaýipti aımaqtardy anyqtap, turǵyn úılerdi, mektepterdi jáne ınfraqurylym nysandaryn kúsheıtý mindeti júkteldi. Opyrylym men kenet sý basý qaýpi joǵary óńirlerge evakýasııalyq bólimsheler jiberildi.
Qaýip tóngen aýyl sharýashylyǵy jerlerine shamamen 300 myń gektar kúrish alqaby, 77 myń gektar jemis baǵy jáne 57 myń gektar kaýchýk plantasııasy kiredi.
Eske salsaq, buǵan deıin Qytaıdyń Haınan provınsııasynda «Kadzıkı» taıfýny saldarynan 20 myńnan astam adam evakýasııalanǵan bolatyn.
