Oqý-aǵartý mınıstrliginiń málimetinshe, 2023-2024 jyldary respýblıkada 422 jańa mektep paıdalanýǵa berildi. Bul nysandarda 510 myńǵa jýyq oqýshy ornyn qamtýǵa múmkindik jasaldy. Al 2025 jyldyń sońyna deıin taǵy 217 mektep ashylyp, qosymsha 460 myńnan astam oqýshy orny daıyndalady. Osylaısha úsh jyl ishinde 927 myń orynǵa teń bilim ınfraqurylymy qurylady.
Ár óńir boıynsha da naqty jumystar júrip jatyr. Almaty oblysynda 2025 jyly 54,6 myń oqýshy ornyn qamtıtyn 53 mekteptiń qurylysy bastaldy.
Astana qalasynda 2025 jyldyń sońyna deıin 20 jańa mektep salynyp, 90 myń oryndyq ınfraqurylym iske qosylady.
Túrkistan oblysynda halyq sanynyń qarqyndy ósýine baılanysty eń kóp jańa mektep boı kóterýde – bıyldyń ózinde 15 nysan ashylyp, 18 myńnan astam oqýshy orny berilmek.
Mańǵystaý oblysynda 6 mekteptiń qurylysy júrip jatyr. Olardyń ishinde Aqtaý qalasynda – 2, Jańaózende – 1, al Beıneý men Qaraqııa aýdandarynda 3 jańa bilim oshaǵy salynyp jatyr. Jalpy oblysta 5,4 myńnan astam oqýshy orny ashylady.
Shyǵys Qazaqstan oblysynda 4 mektep paıdalanýǵa berilip, 3,2 myń balaǵa jańa oryn daıyndaldy.
Buǵan qosa, ulttyq joba tek jańa nysandar salýmen shektelmeıdi. Úsh jyl ishinde respýblıka boıynsha 1300 mektep kúrdeli jóndeýden ótedi. 2025 jyly – 262, 2026 jyly – 436, 2027 jyly – 466 mektep jańǵyrtýdan ótpek. Bul qadam aýyldyq jerlerdegi bilim sapasyn kóterýge jáne mektepterdiń materıaldyq-tehnıkalyq bazasyn nyǵaıtýǵa baǵyttalǵan.
Jobanyń taǵy bir baǵyty – ınklıýzıvti bilimdi damytý jáne aýyl mektepterin qoldaý. 2025 jyldan bastap «Aýyl mektebi – sapa alańy» respýblıkalyq jobasy iske qosyldy. Onyń aıasynda 192 tirek jáne 759 shaǵyn jınaqty mektep qamtylmaq. Olarda jańa ádistemeler engizilip, muǵalimderdiń kásibı biliktiligin arttyrýǵa erekshe kóńil bólinedi.
Mamandardyń aıtýynsha, «Jaıly mektep» jobasy Qazaqstannyń bilim berý júıesinde sapaly serpilis jasaýǵa múmkindik beredi. Barlyq jańa mektepter halyqaralyq standarttarǵa sáıkes salynyp, pándik kabınettermen, sport jáne akt zaldarymen, zerthanalarmen, robototehnıka synyptarymen, kitaphanalarmen jabdyqtalady.
«Bul – balalarǵa teń múmkindik berip, sapaly bilim alýyna jaǵdaı jasaıtyn strategııalyq qadam. Ulttyq jobanyń nátıjesinde Qazaqstandaǵy apatty jáne úsh aýysymdy mektepterdiń máselesi birjola sheshiledi», – dep atap ótti Oqý-aǵartý mınıstrliginiń baspasóz qyzmeti.
