QR Mádenıet jáne aqparat mınıstri Aıda Balaeva bul oqıǵanyń mán-mańyzyna toqtalyp, eki el arasyndaǵy kelisimniń nátıjesinde júzege asqanyn atap ótti.
«2022 jyly eki eldiń prezıdentteri deńgeıinde Beıjińde Qazaq mádenı ortalyǵyn, al Astanada Qytaı mádenı ortalyǵyn ashý jóninde sheshim qabyldanǵan bolatyn. Eki eldiń mınıstrlikteri birlesip atsalysyp, búgin sol kelisimniń naqty nátıjesin kórip otyrmyz. Bul – tarıhı oqıǵa. О́ıtkeni Beıjiń qalasynyń qaq ortasynda qazaq mádenıeti men murasyn tanystyratyn ortalyqtyń ashylýy – bizdiń ónerimizdi, ádebıetimizdi, kıno salamyzdy keńinen nasıhattaýǵa zor múmkindik beredi», — dedi mınıstr.
Ortalyqtyń qurylymyna myńnan astam kitapty qamtıtyn shaǵyn kitaphana, qazaq tarıhy men qolónerin, zergerlik buıymdary men ulttyq kıim úlgilerin tanystyratyn murajaılyq burysh, kórme jáne kınozal kiredi. Sonymen qatar qazaq tilin úırenýge arnalǵan eki oqý synyby ashyldy.
Aıda Balaevanyń aıtýynsha, bul ortalyq tek mádenı kórme orny emes, keshendi jobalardy júzege asyratyn alańǵa aınalady.
«Munda kelýshilerge ulttyq mýzyka, sonyń ishinde dombyra óneri de nasıhattalady. Ádebıetimizdi, tarıhymyzdy jan-jaqty tanystyrýǵa múmkindik bar. Qazaqtyń mádenıeti Beıjiń tórinde laıyqty túrde kórsetiletin bolady», — dedi mınıstr.
Osylaısha, Beıjińde ashylǵan Qazaq mádenı ortalyǵy eki halyq arasyndaǵy mádenı baılanystardy tereńdetip, Qazaqstan men Qytaıdyń dostyq qarym-qatynasyn jańa deńgeıge kótermek.
