Foto: Májilistiń Baspasóz qyzmeti – J.Jumabekov
Mártebeli meımandy Májiliste qarsy alǵan Erlan Qoshanov Mońǵolııa árqashan Qazaqstan úshin Azııadaǵy mańyzdy áriptes ekenin atap ótti. Bul rette el basshylyǵy men qazaqstandyqtar kórshi eldiń jetistikterine rııasyz qýanyp, Mońǵolııa Prezıdenti Ýhnaagıın Hýrelsýhtyń bastamasymen júrgizilip jatqan aýqymdy saıası-ekonomıkalyq jáne áleýmettik reformalardy qoldaıdy.
«Elderimizdiń arasyndaǵy qarym-qatynas qarqyndy damyp keledi. Prezıdent Qasym-Jomart Toqaevtyń Mońǵolııaǵa byltyrǵy memlekettik sapary óte nátıjeli boldy. Kóshbasshylarymyzdyń arqasynda ekijaqty baılanysymyz strategııalyq seriktestik deńgeıine kóterilip, túrli salany qamtıtyn 11 qujatqa qol qoıyldy. Búgin biz qol qoıatyn parlamentterimiz arasyndaǵy yntymaqtastyq týraly memorandým áriptestigimizdi jańa beleske kóteredi dep senemin», dedi Májilis spıkeri.
Erlan Qoshanov 2022 jyldan beri Qazaqstanda júzege asyp jatqan konstıtýsııalyq reformalar men ózgerister týraly aıtyp, eki eldiń saıası baǵyttary uqsastyǵyna mán berdi. Byltyr Mońǵolııanyń Uly Memlekettik Hýraly saılaýy aralas júıe boıynsha ótip, Parlament quramyna alǵash ret bes partııanyń ókilderi kirdi.
Parlamentaralyq yntymaqtastyqty damytý jaıyn sóz etken eki tarap depýtattar Nurtaı Sabılıanov pen Ýhnagıın Otgonbaıar basqaratyn dostyq toptarynyń jumysyn kúsheıtý týraly ýaǵdalasty. Turaqty dıalogty salalyq komıtetter aıasynda da yntalandyrý josparlanýda.
Parlamentter basshylary partııa jelisi boıynsha yntymaqtastyqty nyǵaıtý jáne Parlamentaralyq Odaq pen EQYU Parlamenttik Assambleıasy sııaqty kópjaqty alańdarda odan ári birlese jumys isteý máselelerin de qozǵady.
О́z kezeginde Uly Memlekettik Hýral tóraǵasy sıfrlandyrý, jasandy ıntellektini damytý, ekologııa, aýyl sharýashylyǵy sııaqty salalar boıynsha zań shyǵarýda tájirıbe almasýǵa ózara úlken qyzyǵýshylyq bar ekenin atap ótti.
«Qazaqstan – Mońǵolııanyń Ortalyq Azııadaǵy alǵashqy strategııalyq seriktesi. Búgingi bizdiń kezdesýimiz tek parlamentaralyq qatynasty ǵana qamtyp qoımaıdy. Kún tártibinde ekonomıkalyq-saıası, mádenı-gýmanıtarlyq jáne basqa da salalardaǵy ózara is-áreketti damytý máselesi talqylanýda», dedi Dashzegvıın Amarbaıasgalan.
Sondaı-aq, parlamentshiler týrızm baǵytyndaǵy áriptestikti nyǵaıtý, eki eldiń ekonomıkalary úshin kadrlar daıarlaý jáne tehnologııalardy damytý múmkindikterin talqylady.
Kezdesý qorytyndysynda taraptar Parlament Májilisi men Uly Memlekettik Hýral arasyndaǵy yntymaqtastyq týraly memorandýmǵa qol qoıdy. Qujatqa sáıkes, taraptar óz quzyretteri aıasynda saıası, saýda-ekonomıkalyq, ǵylymı-tehnıkalyq, áleýmettik-mádenı, gýmanıtarlyq, basqa da salalarda, sondaı-aq ekonomıkany sıfrlandyrý, ınnovasııalardy damytý men engizý isinde Qazaqstan Respýblıkasy men Mońǵolııa yntymaqtastyǵyn nyǵaıtýǵa jáne damytýǵa járdemdesýge mindettenedi. Sonymen birge Májilis alańynda Shyǵys Qazaqstan oblysy men Qobda (Hovd) aımaǵy arasynda baýyrlastyq qatynas ornatý týraly memorandýmǵa qol qoıyldy.
Resmı sapar aıasynda Mońǵolııa delegasııasynyń «Astana» halyqaralyq qarjy ortalyǵyna, «KAZAKH INVEST» Ulttyq kompanııasyna, Sıfrlyq damý, ınnovasııalar jáne aeroǵarysh ónerkásibi mınıstrliginiń Ahýaldyq ortalyǵyna, «Qazaqstan Ǵarysh Sapary» Ulttyq kompanııasyna jáne basqa da nysandarǵa barýy josparlanǵan.
