Prezıdenttiń aıtýynsha, aldaǵy bes jylda qýaty 6,3 gıgavatt bolatyn «jasyl» energııa nysandaryn iske qosý josparlanǵan. Bul qadam elimizdegi balamaly qýat kózderiniń úlesin aıtarlyqtaı arttyrady.
«Qazir biz qýat kózderin jan-jaqty jańǵyrtyp jatyrmyz. Shetel ınvestorlarynyń qatysýymen aýqymdy jobalar júzege asýda. Biraq Qazaqstannyń túpki maqsaty – qýat kózderin ártaraptandyrý emes. Bul – eń aldymen elimizdiń energııa júıesiniń naqty múmkindigi men memleketimizdiń uzaqmerzimdi múddelerine negizdelgen turaqty damý joly», – dedi Memleket basshysy.
Osy oraıda Qasym-Jomart Toqaev ıadrolyq energetıkanyń róline erekshe toqtaldy.
«Bir aı buryn Almaty oblysynda Qazaqstandaǵy alǵashqy atom elektr stansııasyna qatysty joba «Rosatommen» birge júzege asyryla bastady. Biraq ekonomıkany turaqty damytý úshin bul jetkiliksiz. Ekinshi, tipti úshinshi atom elektr stansııasynyń qurylysyn qazirden bastap josparlaı berýimiz kerek», – dedi ol.
Memleket basshysy jýyrda Qytaı Halyq Respýblıkasynyń Tóraǵasy Sı Szınpınmen ótken kelissózder barysynda atom salasyndaǵy strategııalyq seriktestik jóninde ýaǵdalastyqqa qol jetkizilgenin atap ótti.
«Qazaqstan álemdik kompanııalardyń bárimen ózara tıimdi baılanys jasaýǵa daıyn. Bul ustanym elimizdiń energetıkalyq derbestigin qamtamasyz etý jónindegi maqsatyna saı keledi», – dedi Prezıdent.
Sonymen qatar Qasym-Jomart Toqaev Qazaqstannyń sapaly kómir qory orasan ekenin atap ótip: «Kómir energetıkasyn da umytpaýymyz kerek. Qorshaǵan ortany lastamaıtyn ozyq tehnologııalardy qoldana otyryp, kómirden alynatyn energııany damytýǵa erekshe kóńil bólý qajet. О́zimizdiń tabıǵı artyqshylyqtarymyzdy el ıgiligine durys paıdalana bilýimiz kerek», – dedi.
