Joba Memleket basshysy Qasym-Jomart Toqaevtyń Atyraýda ótken Ulttyq quryltaıda aıtqan tujyrymdamasy negizinde júzege asyrylady. Joba aıasynda «Kitap oqıtyn mektep», «Kitap oqıtyn kolledj», «Kitap oqıtyn ýnıversıtet», «Kitap oqıtyn pedagog», «Kitap oqıtyn áýlet», «Kitap oqıtyn memlekettik qyzmetshi» dep atalatyn alty baǵyt boıynsha baıqaý uıymdastyrylady.
Ár baǵytqa qatysýshylardyń jasy men qyzyǵýshylyqtary eskerile otyryp 15 kitap daıyndalǵan. Jalpy, tizimge «100 kitap» jalpyulttyq saýalnama nátıjesinde tańdalǵan shyǵarmalar men álemdik bestsellerler engizildi. Mysaly, «Oqıtyn mektep» baǵyty úshin 6–10 synyp oqýshylaryna ár synypqa 15 kitaptan, jalpy 75 kitap tizimi ázirlengen.
«Kitap oqıtyn ult» jobasy aıasynda baıqaýǵa qatysýshylar kitap oqıdy, shyǵarmashylyq tapsyrmalar oryndaıdy, zııatkerlik baıqaýlarda baq synasady.
2025 jyly atalǵan jobaǵa Qostanaı oblysynyń 40 myńnan astam turǵyny qatysady. Baıqaýdy «Amanat» partııasynyń qoldaýymen «Kitap oqıtyn ult – Chıtaıýshaıa nasııa» qoǵamdyq qory men Qostanaı oblysynyń ákimdigi uıymdastyryp otyr. Bas demeýshi – «Alageum Electric» kompanııasy. «Bizdiń basty maqsatymyz – elimizde kitap oqý mádenıetin qalyptastyrý, balalardan bastap barlyq sanattaǵy azamattarymyzdyń kitapqa degen súıispenshiligin oıatý», deıdi atalǵan qordyń atqarýshy dırektory Aıan Sakoshev.
Munyń syrtynda, mektepterde oqyrmandar klýbtary qurylyp, oqylǵan shyǵarmany taldaý, talqylaý keshteri ótedi.
«Búgin biz oblysta «Kitap oqıtyn ult» jobasynyń bastalǵanyn jarııalaımyz. Atalǵan jobaǵa Qaraǵandy oblysy men Shymkent qalasy da qatysady. Sondyqtan óńir turǵyndaryn kóshten keıin qalyp qoımaı oqyrmandar saıysyna belsendi qatysýǵa shaqyramyn. Bul – jańa bilim kókjıegin ashatyn, jeke tulǵany damytatyn jáne zııatkerlik áleýetti nyǵaıtatyn, oqý mádenıetin qalyptastyrýǵa jasalatyn mańyzdy qadam», deıdi Qostanaı oblysy ákiminiń orynbasary Baqytjan Narymbetov.
Baıqaý jeńimpazdary qomaqty qarjylaı syılyqpen marapattalady.
Qostanaı oblysy
