Kásipqoı boks • 10 Qyrkúıek, 2025

Jerlesterimiz jeńiske jetti

10 ret

kórsetildi

3 mın

oqý úshin

Almatydaǵy Balýan Sholaq atyndaǵy sport saraıynda kásipqoı boks keshi ótti. Jarystyń basty jekpe-jeginde elimizdiń tanymal bylǵary qolǵap sheberi Álı Ahmedov (23-2, 17 KO) pen Tanzanııanyń tarlany Djozef Maıgvısııa (14-4, 10 KO) kúsh synasty.

Ǵalym SÚLEIMEN

Taıaýda ǵana qurylǵan «Ali Akhmedov Promotions» kompanııasy uıymdastyrǵan jarysta esimderi kópshilikke beımálim birqatar boksshyǵa óz sheberlikterin kórsetýge múmkindik berildi. Olardyń deni senimdi aqtap, jergilikti jankúıerlerdi jarqyn jeńisterimen qýantty. Atap aıtsaq, Qanat Sangıl (8-0, 4 KO) úndistandyq Hardjot Sınghty (11-2-1, 11 KO), Rolan Ogaı (1-0) taılandtyq Komsan Vongsýrındi (1-11, 1 KO) birinshi raýndta-aq uryp jyqsa, Baýyrjan Bekmurzaev (6-0-1, 5 KO) ózbekstandyq Sharobıddın Djýrahonovty (2-7-1, 2 KO) ekinshi raýndta esinen tandyrdy. Farýh Toqtasynovtyń (3-0, 2 KO) qarsylasy Sharobıddın Djýrahonov (2-7-1, 2 KO) jekpe-jekti jalǵastyrýdan bas tartty. Vıktor Temirov (9-0, 6 KO) Úndi eliniń taǵy bir ókili Santosh Baralıdi (2-2, 1 KO) upaı sanymen utty. Dostanbek Mamutov (1-0) pen Rafaıl Ivanov (0-1), Nurjan Serikbaev (7-2, 7 KO) pen Yntymaq Dáýit (2-2, 1 KO) syndy jerlesterimizdiń ózara aıqasy alǵashqylardyń paıdasyna sheshildi.

Sporttyq mansabyn áýesqoı rıngten bastaǵan Balaýsa Muzdyman (8-0, 6 KO) qazirgi kezde kásipqoılar arasynda tabysty óner kórsetip júr. Buǵan deıingi kezdesýleriniń barlyǵynda jeńiske jetken Balaýsa bul joly úndistandyq Mamta Sınghty (7-2-1, 4 KO) tórtinshi raýndta nokaýtqa jiberdi.

Kópten beri kórinbeı ketken Janqosh Turarovty (28-0, 20 KO) jankúıerler saǵynyp qalǵan eken. Balýan Sholaq atyndaǵy sport saraıyna jınalǵan kórermender saqa sportshyny erekshe qoshemetpen qarsy aldy. Janqoshtyń joly fılıppındik Álı Kanegamen (12-2-1, 8 KO) qıysty. Qandasymyz qarsylasyn básekeniń basynan aıaǵyna deıin tómpeshtedi. Tipten birneshe márte nokdaýnǵa da jiberdi. Jekpe-jek aıaqtalǵannan soń, tóreshiler biraýyzdan Janqoshtyń myqtylyǵyn moıyndady.

Alystaǵy Amerıkada shyńdalyp, uzaq ýaqyt boıy dańqty Gennadıı Golovkınmen birge jattyqqan Álı Ahmedov (24-2, 17 KO) Almatydaǵy jarysta Tanzanııadan kelgen Djozef Maıgvısııanyń (14-4, 10 KO) tas-talqanyn shyǵaratynyna senimdi edik. Biraq biz oılaǵandaı bolmady. Afrıkalyq boksshy qaımyqpaı aıqasyp, Álıge ájeptáýir qarsylyq kórsetti. Desek te Maıgvısııaǵa qaraǵanda bizdiń boksshynyń soqqylary dálirek ári qattyraq tıdi. Sol sebepti de tóreshiler Á.Ahmedovti jeńimpaz dep tanydy.