Sýret: ult.kz
Almaty qalasy Azamattyq alıansynyń tóraǵasy Qaıyrjan Abdyhalyqov Prezıdent kezekti Joldaýynda eldegi barlyq salany qamtıtyn úlken jospar usynǵanyn, ásirese, sıfrlyq tehnologııalar men jasandy ıntellektiniń múmkindikterin jetik meńgerý barlyq salaǵa serpin beretinin alǵa tartty.
– Joldaýda Jasandy ıntellekt jáne sıfrlyq damý mınıstrligin qurý usynyldy. Bul mınıstrlik sıfrlandyrý isin úılestirip, aýyl sharýashylyǵy, bilim berý, turǵyn úı-kommýnaldyq sharýashylyq pen sý resýrstary sııaqty birneshe salaǵa jaýapty bolmaq. Bul elimizdegi sıfrlyq transformasııa úderisiniń jańa kezeńge aıaq basqanyn bildiredi. Jasandy ıntellekt – ýaqyt suranysy. Elimiz osy múmkindikti der kezinde paıdalanyp, halyqaralyq básekede óz ornyn naqtylaı alýy kerek. Ol úshin kadr daıarlaý, ınnovasııalyq ekojúıe qalyptastyrý, ǵylym men óndiristi ushtastyrý basty basymdyq bolmaq. Búginde JI tek tehnologııalyq qural emes, ulttyq qaýipsizdik, ekonomıkalyq ósim, densaýlyq saqtaý, bilim berý, tipti óner men mádenıettiń de tiregine aınaldy. Ozyq elderdiń bári JI-di damytýǵa trıllıondaǵan qarjy bólip otyr. О́ıtkeni kim osy salany meńgeredi, sol el bolashaqty qalyptastyrady. Osy oraıda Prezıdent ónerkásiptiń damýyna erekshe toqtaldy. Onyń aıtýynsha, jańa tehnologııasyz ekonomıkany ártaraptandyrý múmkin emes. Aýyl sharýashylyǵynda da ózgeris bolady. Ǵylymı ortalyqtar bazasynda agrotehnologııalyq hab qurylyp, sý resýrstaryn baqylaý úshin sıfrlyq júıeler engizilmek. Munyń bári ýaqyt talabynan týǵan sheshimder, – dedi Q.Abdyhalyqov.
Saıasattanýshy Nurlan Asqaruly álemdik tájirıbe JI-diń qaýpinen buryn, berer múmkindigi mol ekenin kórsetip otyrǵanyn, biraq bul tehnologııa adamzat ıgiligine jumys isteýi úshin etıkalyq, quqyqtyq jáne adamı baqylaý mańyzdy ekenin aıtady. Sarapshynyń aıtýynsha, Prezıdenttiń mınıstrlik qurý týraly usynysy – osy úderisti baqylaýda ustap, ulttyq múdde turǵysynan damytýǵa baǵyttalǵan utymdy sheshim.
– Búginde el azamattary sheteldik platformalar men servısterdi keńinen paıdalanady. Bul – bir jaǵynan yńǵaıly bolǵanymen, ekinshi jaǵynan derekter qaýipsizdigi turǵysynan alań týǵyzady. JI mınıstrligi ulttyq ónimderge basymdyq berip, eldiń sıfrlyq egemendigin qamtamasyz etýge yqpal etedi, – dedi ol.
Joldaýda aıtylǵan kólik pen logıstıka salasynyń bolashaǵy, kommýnaldyq júıelerdi jańartý, energııa únemdeıtin jańa tehnologııalar engizý, jol-kólik qaýipsizdigi máseleleri de nazardan tys qalǵan joq. Joldaý tek tapsyrmalar jıyntyǵy emes, el úmiti men bolashaǵynyń baǵdary ekenin aıtqan sarapshylar kezekti qujatta el damýyna bastaıtyn negizgi basymdyqtar qamtylǵanyn atady.
ALMATY
