Eti tiri, tirligi iri Ernat Tilekuly atasynyń jolyn jalǵaýdy muraty sanaıdy. Mahmet atasy aýyl sharýashylyǵy salasynyń jetekshi mamany bolypty. Ata ónegesin sińirip ósken ul da óziniń sharýashylyǵyn ashyp, kásibin dóńgeletedi.
Qoradaǵy kúndelikti sharýa jastaıynan malsaq Ernattyń bir ózinen artylmaıtyn kórinedi. Sodan eńbekpen shymyr bolyp ósken ol deneshynyqtyrý páni muǵalimi mamandyǵyn oqyp alady. Oqýyn oıdaǵydaı támamdaǵan onyń oıyna mal bordaqylaý kásibi keledi. Janyp turǵan jas jigitti otbasy da qoldap, senim bildirip, ákesi demep jiberedi.
Sóıtip, atasynyń atyn ıemdenip, «Mahmet Agro Farming» sharýashylyǵyn ashady. Úkimettiń jeńildetilgen nesıesiniń de kóp kómegin kórip, 25 mln qarajat alyp, sharýashylyqtyń qajetine jumsaıdy.
О́ziniń qorasyn keńeıtip, janynan taǵy bir mal bordaqylaý alańyn salady. Jyl on eki aı taı, qunan, dónen, bıe jemdeıdi. Otyz jylqyǵa oryn bar. Al jańadan salǵan bazynda 40 sıyr jemdeıdi. Aýyldastarynan, kórshi eldi mekenderden bir jasar buzaý satyp alyp, bir jyl bordaqyǵa qoıady. Mal azyǵy mol bolsa, ár buqa shamamen 100 kılo salmaq qosady. Sóıtip, eńbek súıgen Ernat jylyna 40–50 tonna et óndirip otyr.
«Mal bordaqylaý – dálme-dál ýaqytty, erik-jigerdi talap etetin sharýa. Kúndiz-túni qorada bolýyń kerek. Jem-shóbi, sýy ýaqytysymen bolǵan jón. Mal astyn tazartyp otyrý – birinshi másele. Osy eńbegimizge saı raqatyn da kórip otyrmyz. Úıimizdi keńeıtip, úlken qonaq bólmesi men jatyn bólmelerdi kóbeıtip jatyrmyz. Osynyń bári – eńbegimizdiń, maldyń arqasy», deıdi Ernat.
Ernat Tilekuly tehnıkanyń da tilin erte meńgergen. Jastaıynan eginniń, shabyndyqtyń qym-qýyt tirshiligin kórip ósken azamat. Sonyń arqasynda malynyń jem-shóbin ózi daıyndaıtyn besaspap jigit. Qazir sharýashylyǵynda traktory, shóp shabatyn tehnıkasy, prestegish mashınasy bar. Egin oratyn «Enıseı-1200 1nm» kombaıny, áıgili «Gaz-53» júk kóligi saǵat tilindeı sartyldap tur. Olardyń da maı-sýyna, saımandaryna bir ózi jaýapty.
Ernattyń kómekshisi – ákesi Tilek jáne baýyrlary. Egin salýdy 2018 jyldan beri qolǵa alyp keledi. 2019 jyly 100 gektar jerge kópjyldyq ekpe shóp egip, qazir sonyń jemisin kórip otyr. Sharýashylyǵynda shabyndyǵyn, egin aýmaǵyn, jaıylymyn qosa eseptegende 350 gektar jeri bar.
Jas fermer mal semirtýdiń qyzyǵyna ábden kirgen. 100–110 kılo bolǵan bir jasar buzaýdy tarazyǵa salǵanda 200 kıloǵa deıin tartqyzady. Sonda jem-shópke ketken shyǵyndy alyp tastaǵanda, etten 80 kılo paıda kóredi. Al jylqy malyna 70–80 kıloǵa deıin salmaq qostyrady. Bordaqy mal azyǵynyń qunary joǵary bolsa ǵana nátıje beredi. Sol sebepti sıyryna tartylǵan bıdaıdy, jylqyǵa kebek pen ekinshi sort unyn aralastyryp beredi. Et ónimin Qaraǵandynyń «Araı», «Shyǵys», «Altyn arba» bazaryna ótkizip otyr. Onymen qosa óziniń de turaqty tutynýshylary bar.
Jalyndy jas jigit jıyrma jasynda aýylyndaǵy arý Aqbotamen otaý qurady. Qazir eki jas – tórt balanyń ata-anasy, kópbalaly otbasy. Aıaýly jary da Ernattyń sharýasynyń bir jaǵynan shyǵysady. Aýylynyń pysyq kelini atanǵan Aqbota ekeýiniń eńbekqorlyǵyna Saryobaly aýylyndaǵylar súısinedi.
Ernat Tilekuly sharýashylyǵynyń múmkindigin molaıtqysy kelip otyr. Alaıda shabyndyqtyń, jaıylymnyń azdyǵy azdaǵan kedergi keltirip otyrǵan kórinedi. Úıir-úıir jylqy ósirip, sıyrdyń da sanyn kóbeıtý oıynda bar. Kelinshegi Aqbota da sút ónimderin óndirip, qurt-maıyn saýdaǵa shyǵarǵysy keledi. Onymen qosa Ernat egin salatyn jerin jańartyp, jem-shóp qoryn molaıtýdy josparlap qoıǵan. Qysqasy, atasynyń atyndaǵy sharýashylyǵyn san salaly qylǵysy keledi. Oǵan eńbekqor eki jastyń áleýeti de, áreketi de jetedi.
Qaraǵandy oblysy,
Qarqaraly aýdany,
Saryobaly aýyly
