Is-sharaǵa Qostanaı oblysy ákiminiń orynbasary Baqytjan Narymbetov, oblystyq, qalalyq ardagerler keńesiniń, Qazaqstan halqy Assambleıasynyń ókilderi, ǵumyrynyń ǵasyrlyq belesine kóterilgen qart maıdangerdi alys-jaqynnan arnaıy quttyqtaı kelgen meımandar, qala turǵyndary qatysty.
Saltanatty keshte oblys ákiminiń orynbasary Baqytjan Narymbetov ardagerge Mádenıet jáne aqparat mınıstriniń quttyqtaý hatyn tabys etti.
«Júırik ýaqyttyń ushqyr qanaty sizdi adam ǵumyrynyń bıik belesi bir ǵasyrǵa alyp keldi. Siz osy kemel jasyńyzǵa tyń jigermen, jarqyn kóńilmen kelip otyrsyz. Soǵys jyldary qolyńyzǵa qarý alsańyz, beıbit zamanda qalam ustap, qazaqtyń rýhyn, tilin, dilin kóterdińiz. Búginde bir áýlettiń altyn tamyry bolyp otyrsyz. Keıingi beıbit zamanda aıanbaı eńbek etken, qajyrly, júrekti, jeńimpazdar býynynyń jarqyn ókilisiz. Sizdiń jeńis jolyndaǵy erligińiz ben ǵıbratty ǵumyryńyz – rýhtyń beriktigi men otanǵa degen sheksiz súıispenshiliktiń úlgisi», dedi B.Narymbetov.
Qasymhan Aldabergenov ásker qataryna 17 jasynda, 1943 jyly 10 qańtarda alyndy. Aldymen Zlatoýstaǵy 6 aılyq pýlemetshiler ýchılıshesinde oqý-jattyǵýdan ótti. Keıin jańa qurylǵan 14-áýe desanty brıgadasyna qabyldandy. Maıdanger jeti jarym jyl áskerı boryshyn ótep, elge 50-jyldary ǵana oralady. 30 jyl ustazdyq etti. Aýdandyq gazette qyzmet atqardy. Oblystyq aıtystarǵa qatysyp, Omar Shıpın, Nurqan Ahmetbekov syndy sańlaq aqyndarmen sóz qaǵystyryp kórdi.
1959–1979 jyldar aralyǵynda Qostanaı óńirinde alty ret aqyndar aıtysy ótken eken. Q.Aldabergenov osy aıtystarda tórt ret júldeli bolypty.
Kezdesý barysynda oblystyq ardagerler keńesiniń tóraǵasy Batyrbek Ahmetov quttyqtaý sóz sóılep, qart maıdangerge Respýblıkalyq ardagerler uıymynyń tóraǵasy, Májilis depýtaty Baqtyqoja Izmuhambetovtiń quttyqtaý haty men «Qurmet belgisi» tósbelgisin tabys etti.
«Osy toıdyń basy-qasynda júrip, sátti ótýine úlesin qosqan oblys ákimdigine alǵys aıtamyn. Qostanaı oblysynda segiz maıdanger bar. Bıyl ekinshi ardagerimiz júzge kelip otyr. Sizdiń jasyńyzdy bárimizge bersin. О́zińizge senip tapsyrylǵan qaı iske de asqan uqyptylyqpen qarap, biliktilikpen atqara aldyńyz. Kóp is tyńdyrdyńyz. Búginde el aǵasy retinde ardagerler arasynda tushymdy oılaryńyzdy ortaǵa salyp júrsiz. Bul jetistiktiń barlyǵy – baıandy jumysyńyzdyń laıyqty nátıjesi», dedi B.Ahmetov.
Maıdangerdi kezinde «Qostanaı tańy» gazetinde birge qyzmet etken áriptes inisi, belgili jýrnalıst Qaısar Álim Astanadan arnaıy kelip quttyqtap, aqjarma tilek arnady.
«Búgin netken keremet, baqytty, shattyqty kún. Sebebi uly ámirshi ýaqyttyń nusqaýymen kez kelgen adam 100-ge kele bermeıdi. Bul – ómir shyndyǵy. Bizdiń ustazymyz ǵasyr jasap, aldymyzda otyr. Qasymhan aǵa – qazaq jýrnalıstıkasynyń, ádebıeti men óneriniń alyp tulǵasy. Osynsha ómirde bul kisiniń kórmegen qıyndyǵy, sezbegen baqyt sezimi bolmaǵan shyǵar. Basyna túsken qıyndyqty da, qýanyshty da ótkerdi. Bizdiń aldymyzda ǵasyr jasaǵan ýaqyttyń emeni tur. Emen ıilmeıdi. Emenniń japyraǵy tórt maýsymda da óziniń jasyl qasıetin joǵaltpaıdy. Sondyqtan búginde aǵamnyń 100 jyldyǵynda sóılep turǵanymnyń ózi – qurmet. Gazette birge eńbek ettik. Qasymhan aǵa, sizdiń ónegeli ǵumyryńyz kúlli qazaq eline maqtanyshpen aıtýǵa turarlyq», dedi qalamger.
Kesh barysynda oblys ónerpazdary jyrdan shashý shashty. Jas kúıshi Mark Lı mereıtoı ıesiniń «Nurhan sazy» kúıin oryndady. Qamysty, Jitiqara, Naýyrzym aýdany ákimderiniń orynbasarly da qarııanyń ıyǵyna shapan jaýyp, qurmet kórsetti.
Merekelik is-shara aıasynda Qasymhan Aldabergenovtiń ómir jolynan syr shertetin kórme ashyldy. Kezdesý sońynda maıdanger oblys basshylyǵyna, kópshilikke rahmetin aıtyp, batasyn berdi.
Qostanaı oblysy
