Dinaralyq kelisim ıdeıalary dáıekti dáripteledi

Máýlen Áshimbaev Muham­med Abdýlkarım Ál-Isaǵa iltı­pat bildirip, lıga­nyń tolerant­tylyq, ózara qurmet jáne din­aralyq kelisim ıdeıa­laryn dáripteý jolyndaǵy qyzmetine, sondaı-aq uzaq jyl boıy sezdiń maqsat­tary­na qol jetkizýge qosyp kele jatqan úlesine joǵary baǵa berdi. Palata spıkeri DIL Bas hatshysy bastamashy bolǵan Batys pen Shyǵys arasyndaǵy qarym-qatynasty nyǵaıtýdy kózdeıtin «Building Bridges between East and West» halyqaralyq platformasynyń mańyzyna nazar aýdaryp, ony iske asyrýǵa qoldaý bildirdi.

«Qazaqstan Prezıdenti Qasym-Jomart Toqaev halyq­aralyq qaýipsizdiktiń berik júıesin qalyptastyrý máse­lelerine únemi basa mán berip keledi. Osyǵan baılanysty biz úshin Dúnıejúzilik ıslam lıgasymen ózara is-qımyldy arttyrý aıryqsha mańyzǵa ıe. Bizdiń baılanystarymyz keıingi jyldary aıtarlyqtaı jandana tústi. Qazirgi tańda Dúnıejúzilik ıslam lıgasy musylman qaýymynyń ynty­maǵyn nyǵaıtý, ortaq rýhanı qundylyqtardy nasıhattaý jáne bilim berý baǵyttarynda aýqymdy jumys atqaryp keledi. Aldaǵy ýaqytta Qazaqstan musylmandary dinı basqarmasy men Dúnıejúzilik ıslam lıgasy arasyndaǵy yntymaqtastyq nyǵaıa túsedi dep úmittenemiz», dedi M.Áshimbaev.

Sonymen qatar Álemdik jáne dástúrli dinder kóshbas­shylary sezi hatshylyǵynyń basshysy mártebeli meıman­ǵa sezge shaqyrýdy qabyl al­ǵany úshin alǵys bildirdi. Sondaı-aq ol Dú­nıe­júzilik ıslam lıgasy men Álemdik jáne dástúrli dinder kósh­basshy­­lary seziniń maqsat­tary, mıssııa­sy jáne basym baǵyt­tary ortaq ári uqsas ekenine nazar aýdardy. Suhbat kezinde dinge, násilge jáne senimge qatys­ty kemsitýshiliktiń barlyq túrin aıyptaıtyn Mekke dek­larasııasynyń mańyzyna da erekshe mán berildi. Qujat álemdi tózbeýshilik pen jek­kórýshilikke qarsy birlesip áreket etýge úndeıdi.

Kezdesý barysynda taraptar qazirgi ózekti syn-qaterlerdi talqylap, olardy eńserý jáne basqa da baǵyttar boıynsha ynty­maqtastyqty odan ári nyǵaıtý jóninde óz usynystaryn bildirdi. Naqty aıtqanda, ǵylym, bilim berý, sıfrlandyrý jáne ózge de mańyzdy salalarda baılanys­ty keńeıtýge qatysty qol­danystaǵy, sondaı-aq aldaǵy birlesken jobalar týraly sóz boldy.

О́z kezeginde Dúnıejúzilik ıslam lıgasynyń Bas hatshysy Sheıh Muhammed Abdýlkarım Ál-Isa sezd hatshylyǵynyń basshy­syna shaqyrý úshin alǵy­syn jetkizdi. Sondaı-aq ol halyq­aralyq qaýymdastyq úshin mun­daı forým ótkizýdiń asa mańyz­dy jáne qazirgi ortaq prob­lema­lar­dy eńserý jolynda kúsh birik­tirýdiń bereri mol ekenin aıtty.