Memleket basshysy Qasym-Jomart Toqaev buǵan deıin birneshe ret ár oblys pen aýdan ortalyǵynda, aýyldarda zamanaýı fýtbol alańdary salynýy tıis ekenin atap ótken. Sondaı-aq ol demeýshilerdiń qoldaýymen jańa fýtbol stadıondaryn turǵyzýdy tapsyrǵan bolatyn.
Osy tapsyrmalardy júzege asyrý maqsatynda bıyl shilde aıynda Qaraǵandy oblysy ákimdigi men Freedom Holding Corp. kompanııasynyń bas dırektory Tımýr Týrlov arasynda yntymaqtastyq týraly memorandýmǵa qol qoıyldy. Sonyń nátıjesinde aımaqta fýtbol akademııasynyń qurylysy qolǵa alyndy.
Akademııa 9,6 gektar aýmaqta salynady. Ǵımarattar men nysandardyń jalpy aýmaǵy 28 myń sharshy metrden asady. Jospar boıynsha munda: 3500 kórermenge arnalǵan stadıon, jyl boıy jumys isteıtin jabyq manej, jylytý júıesi bar tolyq ólshemdi jattyǵý alańy, uldar men qyzdarǵa arnalǵan ınternat, jattyqtyrýshylar kabıneti, oqý synyptary, medısınalyq bólimder, ashana, dýsh, saýna jáne basseıni bar ákimshilik keshen boı kóteredi.
Jobany Freedom Holding Corp. qarjylandyrady. Qaraǵandyda fýtbol akademııasyn salýǵa 12 mıllıard teńge bólinedi. Akademııa «Shahtıor» fýtbol klýbynyń bolashaq oıynshylaryn daıyndaıtyn negizgi bazaǵa aınalady. Sonymen qatar, ınvestor aımaqtaǵy buqaralyq fýtboldy damytýǵa qosymsha 6,5 mıllıard teńge baǵyttaıdy: aýyldar men qalalarda shaǵyn fýtbol alańdaryn salý, mektepter men balabaqshalarda sporttyq baǵdarlamalardy engizý, týrnırler men festıvalder uıymdastyrý kózdelgen. Áıelder fýtboly men jasóspirimder fýtbolyna da erekshe nazar aýdarylady.
