Qurylys basyndaǵy qyzmeti – árlep-syrlaý proraby. Sóılegende qandaı jyldam bolsa, isi de sondaı shıraq. Talapshyl basshy ekeni túr-tulǵasynan-aq kórinip tur. Kókshetaýdyń týmasy. Oqyǵan mamandyǵy – agronom. Keńes úkimeti tusynda komsomol, partııanyń jumysyna aralasqan. Aýmaly-tókpeli kezeńde et jaqyndarynan aıyrylǵan. Jeke ómirindegi aýyr synaqtardy kótere bilgen ana jumystyń qıyndyǵyna shaǵymdanyp, moıyǵan emes. Qoldaý bildirip, senim artatyn jaqyn adamdary qasynda. Jumysyna uqypty, tirligine tııanaqty, bastysy, adal nıetpen, eselep eńbek etip júr.
– Elordaǵa ǵasyrlar toǵysynda keldik. Ol kez qala endi-endi qalyptasyp, ǵımarattar kóptep salyna bastaǵan tus. Talaı qurylystyń basy-qasynda boldyq. Sylap, syrlaýdy úırendik. Tájirıbe jıǵan soń, ózgelerge úırete bastadyq. Zaman ózgerdi, zamanmen birge eńbek naryǵy, eńbekke kózqaras jańardy. Biz qurylysqa kelgen jyldary úıdiń ishi-syrtyn sylap, syrlaýmen túgel áıelder aınalysatyn. Árleý-syrlaýmen aınalysamyn degenge qazir de jumys kóp. Úı bolǵan soń tozbaı turmaıdy, ony jóndeýge bilikti maman kerek. 25 jyldyq tájirıbeme súıenip aıtarym, qurylysshy bolý da – óner. Oǵan erekshe ep, yjdaǵatty yqylas kerek. Sheber jumysshyny kez kelgen kompanııa táýir jalaqy usynyp, shaqyrtyp alady. О́zimniń bir de jumyssyz júrgen kezim bolǵan emes. Jumys bolsa, eńbekten qashpaımyz, – degen L.Bekqulova bizdi qasyna ertip, ádetimen qurylys barysyn baqylaýǵa shyqty.
Keıipkerimizdiń jasy qazir 62-de. Eńbegine 500 myń teńgeden joǵary jalaqy alady. Úıdi árlep-syrlaıtyn brıgadalardyń jumysyn tekserip, qabyldaıdy. Qate-kemshin tusyn kóre qalsa, túzeýge, qaıta isteýge mindetteıdi. Kezekti qabattyń sapasyn tekserip júrip, áńgime aýanyn qaladaǵy qurylystardyń sapasyna burdy.
– Jumystyń sapasyna jaýapty bolǵan soń qate kórsek, birden eskertemiz. О́ıtkeni jumysty rastap, qujatqa qol qoıatyn ózimiz. Biz aıtqanda kemshiligin moıyndap, lezde jumysyn retteýge kirisetin aptal azamattar bar. Sondaǵysy maǵan emes, ózderine namystanady. Olardyń qolynan jumysty qate isteý kelmeıdi. Myqty qurylysshy tárbıelegen balalar alǵyr, tirligine uqypty bolady. Men biletin naǵyz jumysshy mamandar solar. О́z mindetimiz týraly aıtsam, áýeli úıdiń qabyrǵalaryn sylaımyz, sylaǵan soń aǵartamyz. Izinshe betindegi kedir-budyryn tegistep, boıaımyz. Qurylys alańynda 12 qabatty eki úıdiń, 18 qabatty bir úıdiń ár qabatyna kúnde eki márte kóterilemin. Jumys aýqymdy. Bir mezgilde 500 adamnyń jumysyn baqylaǵan kezimiz boldy. Qurylysta jumysshy birinshi ádil, sosyn shynshyl bolýǵa tıis. Jumysty shala-jansar istegenderdiń ótirigi túbi áshkere bolady. Biz ondaı olqylyqtarǵa jol bermeımiz. Halyqtyń senimimen, qaýipsizdigimen oınaýǵa bolmaıdy, – deıdi L.Bekqulova.
L.Bekqulova Astana qalasyndaǵy sáýleti men dáýleti kelisken 50-ge jýyq ǵımarattyń sapasyn ózi qadaǵalaǵan. Birneshe qurylys kompanııasynda jumys istegen. Zamannan qalmaı, qurylys salasyndaǵy jańashyldyqtarǵa, standarttarǵa ilesip otyrady. Biz kóterilgen ǵımarattyń burysh-buryshynyń dáldigin arnaıy aspaptarmen jiti tekserdi. Qurylystyń sapasyn jaqsartqan standarttardy sóz etip, sonyń qanshalyqty saqtalǵanyn naqty kórsetip berdi. Tájirıbeli maman óz sózinde jyl ótken saıyn qurylys kompanııalary da sapaly jumys isteýge daǵdylanyp kele jatqanyn aıtty. Munyń sebebin qurylys basshylyǵynyń, turǵyndardyń talaby joǵarylaǵannan dep túsindirdi.
– Atústi jasalǵan jumysty úı turǵyndary qabyldamaıdy. «Tam – túbinen» degen sóz bar. Turǵyn úıdiń aldymen irgesi berik bolǵany abzal. Odan keıin kirpishtiń túzý qalanǵany, sylaqtyń sátti shyǵýy, syrlaý jumystary – bári-bári túbinde sapaǵa áser etedi. Sapaly úıdi adal qurylysshylar kóteredi. Myqty qurylysshy bolý – tájirıbeden. Salada eńbek etip júrip, nebir sheber qurylysshylardy, ınjenerlerdi kórdik. Áli kúnge maqtaýyn asyryp, ózgelerge úlgi etip júremiz. Qurylys salasy damyp keledi. Sondyqtan ózimizden keıingige bilgenimizdi aıtyp, bilmegenimizdi úırenip júrmiz, – dedi L.Bekqulova.
Keıipkerimizdiń qapysyz qarym-qabiletine, jyldar boıǵy tájirıbemen kelgen sheberligine tánti bola otyryp, el aıtyp júrgen eńbek adamynyń shynaıy beınesi osyndaı bolsa kerek degen oı qoryttyq.
