Sýret: senate.parlam.kz
Senat spıkeri mártebeli meımandarǵa iltıpat bildirip, Álemdik jáne dástúrli dinder kóshbasshylary seziniń mıssııasy jahandyq syn-qaterler jaǵdaıynda halyqtar, mádenıetter jáne dinder arasyndaǵy qarym-qatynasty jolǵa qoıýǵa taban tireıtinin aıtty. Sondaı-aq ol forým ıdeıalaryn jan-jaqty qoldaǵany jáne kózdelgen maqsattarǵa qol jetkizýge eleýli úles qosqany úshin qatysýshylarǵa rızashylyq bildirdi.
– Prezıdent Qasym-Jomart Toqaev halyqaralyq qaýipsizdiktiń berik júıesin qalyptastyrý máselesine árdaıym basa mán beredi. Qazirgi tańda álem geosaıası shıelenistermen, áleýmettik-ekonomıkalyq, ekologııalyq jáne klımattyq qıyndyqtarmen, sondaı-aq basqa da syn-qaterlermen betpe-bet kelip otyr. Osy kúrdeli kezeńde rýhanı dıplomatııa búgingi problemalardy sheshýdiń tıimdi joldaryn tabatyn mańyzdy tetigi bola alady. Sondyqtan jahandyq syn-qaterlerdi eńserý úshin din kóshbasshylarynyń jasampaz róli aıryqsha mánge ıe jáne osy jolda kúsh biriktirýdiń mańyzy zor, – dedi M.Áshimbaev.
Qasıetti Ierýsalımniń jáne búkil Palestınanyń, Arabııanyń, Sırııanyń asa qasıetti Patrıarhy III Feofılmen kezdesýde sezd hatshylyǵy men Ierýsalım Patrıarhaty arasyndaǵy is-qımyldy arttyrý máselesi sóz boldy. Sondaı-aq birlesken jobalardy, onyń ishinde Álemdik jáne dástúrli dinder kóshbasshylary sezi aıasynda ótken Dinı nysandardy qorǵaý jónindegi arnaıy sessııada aıtylǵan usynystardy iske asyrý barysy talqylandy.
Al Bas Ashkenazı ravvıni Kalman Bermen jáne Bas Sefard ravvıni Devıd Iosefpen suhbat kezinde Máýlen Áshimbaev Qazaqstan olardyń álemde konfessııaaralyq jáne dinaralyq dıalogti damytýǵa arnalǵan sezge belsendi qatysýyn joǵary baǵalaıtynyn aıtty. Kezdesýde Qazaqstan men Izraıl arasyndaǵy ekijaqty yntymaqtastyq máseleleri de qozǵaldy.
Sonymen qatar Máýlen Áshimbaev Vatıkannyń Qasıetti taǵynyń Dinaralyq dıalog boıynsha dıkasterııa prefektisi Kardınal Djordj Djeıkob Kývakadpen kezdesip, Rım Papasy Fransısktiń 2022 jylǵy tarıhı saparyna jáne onyń ıslam men hrıstıan álemin jaqyndastyrýǵa qosqan úlesine erekshe toqtaldy. Senat tóraǵasy Qazaqstan Pontıfık resmı saparmen kelgen jáne beıbitshilik pen kópultty úılesimdilikke nazar aýdaryp, «adamdar bir-birin tyńdaıtyn, bir-birin qurmetteıtin kezdesýler men dıalog mekeni» dep ataǵan sanaýly elderdiń biri ekenine toqtaldy.
Mártebeli meımandar óz kezeginde Álemdik jáne dástúrli dinder kóshbasshylary sezi jahandyq aýqymda búkil álem úshin asa ózekti dinaralyq dıalog ıdeıalaryn dáripteý isinde mańyzdy ról atqaratynyn aıtty. Sondaı-aq olar aıtarlyqtaı bedelge ıe rýhanı kóshbasshylar toleranttylyqqa, jaqsylyq pen ádiletke shaqyryp, geosaıası jáne basqa da qaqtyǵystardy beıbit jolmen sheshýge yqpal etýi kerek degen pikirdi qoldaıtyndaryn jetkizdi.
