16 qyrkúıekte qor men mınıstrlik yntymaqtastyq týraly memorandýmǵa qol qoıdy. Joba aıasynda qor 1 mlrd teńge ınvestısııa salyp, 4 mıllıonnan astam aǵash pen kóshet otyrǵyzýdy josparlap otyr.
Qazaqstan Prezıdenti Qasym-Jomart Toqaev óz Joldaýynda tabıǵatty qorǵaýdy ulttyq ıdeologııanyń mańyzdy bóligi dep ataǵan edi. «Halyk ormany» jobasy bul bastamalardy qoldaı otyryp, «Taza Qazaqstan» ulttyq tujyrymdamasynyń júzege asýyna úles qosady.
Jobanyń basty maqsaty – ekologııalyq turǵydan osal aımaqtarda jańa orman alqaptaryn qurý, órtten zardap shekken ekojúıelerdi qalpyna keltirý, bıoalýantúrlikti saqtaý jáne tabıǵı tepe-teńdikti qamtamasyz etý.
Esterińizge sala keteıik, 2023 jyly «Semeı ormany» aýmaǵynda elimiz tarıhyndaǵy eń iri orman órtiniń saldarynan 60 myń gektardan astam jer janyp ketken edi. Bul oqıǵa orman alqaptaryn qalpyna keltirýdiń jáne ekologııalyq apattardyń aldyn alýdyń mańyzdylyǵyn kórsetti.
Joba barysynda halyqaralyq jáne qoǵamdyq uıymdarmen áriptestik ornatylyp, eriktiler arnaıy onlaın-platforma arqyly tartylmaq. Sonymen qatar, otyrǵyzylǵan aımaqtarda ekologııalyq mádenıetti nasıhattaý úshin arnaıy aqparattyq stelalar qoıylady.
«Qorshaǵan ortany qorǵaý – tek bir salanyń mindeti emes. Bul – memlekettiń, bıznestiń jáne qoǵamnyń ortaq isi. Biz qazir tabıǵatty saqtaý jolynda sheshýshi qadamdar jasaýǵa tıispiz. «Halyk ormany» – sondaı ıgi bastamalardyń biri. Joba tek órtten zardap shekken aımaqtardy qalpyna keltirip qoımaıdy, sonymen qatar elimizdiń jasyl qoryn kóbeıtip, klımattyq tepe-teńdikti saqtaýǵa yqpal etedi. Bul bastama – eldiń strategııalyq tańdaýy. Orman otyrǵyzý – ǵasyrlyq is, onyń jemisin urpaq kóredi», dedi Ekologııa jáne tabıǵı resýrstar mınıstri Erlan Nysanbaev «Halyk ormany» jobasynyń mańyzyna toqtalyp.
Kógaldandyrý álemde klımat ózgerisimen kúrestiń negizgi quraldarynyń biri bolyp sanalady. Jańa ormandar bıoalýantúrlikti saqtap, Jerdiń ottektik balansyn qamtamasyz etedi. «Halyk ormany» jobasy Qazaqstannyń jahandyq ekologııalyq qozǵalysqa qosqan úlesin arttyrady.
«Halyk» qorynyń Qamqorshylyq keńesiniń múshesi, Halyk Bank basqarma tóraıymy Úmit Shaıahmetova ınvestısııa tek aǵash otyrǵyzýǵa emes, jasyl aımaqtardy kútip-baptaýǵa jáne ekologııalyq bilim berý jobalaryna da jumsalatynyn aıtty.
«Biz úshin Qazaqstannyń tabıǵı baılyǵyn saqtaý asa mańyzdy. «Halyk ormany» – bul ekologııalyq qaýipsizdik pen el bolashaǵyna salynǵan ınvestısııa. Biz memleketpen jáne qoǵammen kúsh biriktirip, ult pen bolashaq urpaqtyń saýlyǵy úshin eńbek etip kelemiz. Bul joba – keler urpaqqa qaldyratyn eń qymbat muramyzdyń biri. Bul jaı ǵana aǵash otyrǵyzý emes, Qazaqstan tabıǵatyn qorǵaýǵa jasalǵan mańyzdy qadam. Qordyń qoldaýy men qoǵamnyń belsendiligi arqasynda elimizdegi ekologııalyq jaǵdaıdy jaqsarta alamyz dep senemin», dedi ol.
«Halyk ormany» – qordyń turaqty ekologııalyq bastamalarynyń jalǵasy. Buǵan deıin «GreenAct» eko-chellendji arqyly myńdaǵan azamattar men uıymdar ekologııalyq aksııalarǵa qatysyp, Ile-Alataý ulttyq parkinde 3 500 shyrsha, Almaty Ortalyq saıabaǵynda alma aǵashtary otyrǵyzylǵan.
Qor eriktiler men tabıǵatqa beıjaı qaramaıtyn azamattardy jobaǵa qosylýǵa shaqyrady. Ár adamnyń qoldaýy eldegi jasyl aımaqtardyń artýyna jáne ekologııany saqtaýǵa naqty úles qosýǵa múmkindik beredi.
