Jezqazǵan qalasynda ótken J.Hadjıev atyndaǵy IV halyqaralyq teatr festıvalinde ónersúıer qaýymǵa erekshe áser syılaǵan Abaı oblystyq «Darıǵa-aı» jastar teatry bas júldeni, «Úzdik spektakl» atalymyn ıelendi.
Teatr ujymy kórnekti jazýshy Oralhan Bókeıdiń «О́z otyńdy óshirme» dramasyn sahnalap, tereń fılosofııalyq tartysqa toly týyndy qazylar alqasyn tańǵaldyryp, kórermendi tánti etken. Qoıylymnyń rejısseri – Meıram Habıbýllın. Osylaısha, rejısserdiń izdenisi, keıipkerlerdiń jan dúnıesin ashýdaǵy sheberligi men sahnalyq sheshimderiniń ereksheligi úzdik baǵalanyp otyr.
Oblystaǵy Abaı atyndaǵy teatr quramyndaǵy «Darıǵa-aı» jastar teatry professor Darıǵa Turanqulqyzy, belgili qoǵam qaıratkeri, abaıtanýshy, Qazaqstannyń eńbek sińirgen qyzmetkeri Tóken Ibragımovtiń bastamasymen 1999 jyly 14 qarashada ashyldy. Sonymen qatar teatrdyń irgetasyn qalaýǵa professor Maıra Omarbaeva, aǵa oqytýshy Meıramgúl Aleparova, teatrdyń rejısseri hám kórkemdik jetekshisi bolǵan Aqbaráli Aıtybaev syndy azamattar atsalysqanyn aıta ketkenimiz jón. Búginde teatr qorjynynda qazaq qalamgerlerimen qosa shetel dramatýrgteriniń súbeli shyǵarmalary bar.
Abaı oblysy
