Jarma aýdany Qostóbede degen jerdegi ejelgi qorǵandarda qazba jumystary júrgizilgen. Mamandardyń sózinshe, eski qorǵandar ártúrli sebeptermen tonaýǵa ushyraǵan. Áıtkenmen eski qorǵannan tabylǵan kóne jádigerler ǵalymdardy tańǵaldyryp otyr. Arheolog ǵalymdardyń aıtýynsha, Qostóbe mańynda tonalǵan qorǵandarda áli de tarıhı qundy jádiger mol. Arheologtar bul jolǵy qazba jumysy kezinde kóne belbeýdiń qola áshekeıin tapqan. Onda bóri men buǵynyń arpalysy beınelengen. Dálirek aıtqanda, qasqyr buǵynyń tý syrtynan tap bergenin kórýge bolady. Arheologtardyń aıtýynsha, tabylǵan zattar saq dáýirine tıesili.
«Qorǵanda eresek adamnyń jerlengen orny anyqtaldy. Bul jerleý orynnan tabylǵan qyzyqty dúnıelerdiń arasynda ań stılindegi áshekeıli beldik tastarymen bezendirilgen zattar bar. Sondaı-aq, aqınaq, altyn syrǵa jáne basqa da kóptegen zat tabyldy. Olar bizdiń tarıhta áli zerttelmegen tyń derekterin tolyqtaı túseri sózsiz», deıdi Á.Marǵulan atyndaǵy arheologııa ınstıtýtynyń dırektory Tımýr Smaǵulov.
Qazir mamandar tabylǵan jádigerlerdi tazalaý ústinde ekenin aıtady. Qundy jádigerler sol zamannyń derekterin tereń tanı túsýge jol ashatyny belgili. Sol sebepti qorǵannyń qurylymy arheologtardy qatty qyzyqtyryp otyrǵany ras. Olardyń sózinshe, qorymdar birneshe kezeńmen salynǵanǵa uqsaıdy.
«Tastardy ornalastyryp, kishkentaı qorǵan jasaǵan. Ýaqyt óte kele ekinshi, úshinshi kezeńderde topyraq qosýdy bastap, qorǵannyń ózi qalyptasa bastaǵan. Bul prosess ýaqyt óte júrdi. Tas pen topyraq aralasqannan keıin qorǵannyń topyraq úıindisi qalyptasqan», deıdi Á.Marǵulan atyndaǵy arheologııa ınstıtýtynyń ǵylymı qyzmetkeri Talǵat Aılybaev.
Jergilikti mamandardyń málimetinshe, Qostóbe jazyǵynda 150-den asa qorǵan men qorym bar eken. Olardan tabylǵan jádigerler jan-jaqty zerttelýi úshin zerthanaǵa jiberiledi. Sodan keıin ony ornalastyrý jaǵy aıqyndalady.
Abaı oblysy
