21 qyrkúıekte Almaty perzenthanalarynda 69 sábı dúnıege keldi, onyń 32-si ul bolsa, 37-si qyz bala. Osylaısha talaı otbasy súıikti qalanyń týǵan kúnimen qatar perzentiniń dúnıege kelgenin toılady.
«Endi bul mereke bizdiń áýlet úshin eń basty kúnge aınaldy. Qyzymyzdyń týǵan kúnin budan bylaı almatylyqtarmen birge toılaımyz», – dedi jas ana qýanyshyn bólisip.
Qalanyń qoǵamdyq densaýlyq saqtaý basqarmasy ómirge kelgen barlyq náreste men olardyń analarynyń jaǵdaıy jaqsy ekenin habarlady.
Al mereke qarsańynda Qalalyq perınataldyq ortalyqta sırek ári ǵajaıyp oqıǵa boldy – úshem dúnıege keldi.
Salmaǵy 1968 gramm, boıy 42 santımetr ul bala, al qalǵan ekeýi qyz bala: biriniń salmaǵy 1648 gramm, boıy 40 santımetr, ekinshisiniń salmaǵy 1699 gramm, boıy 41 santımetr. Otbasy «Ańsaǵan sábı» memlekettik qoldaý baǵdarlamasyna júgingen.
Dárigerlerdiń sheshimimen anasy 32-aptada shuǵyl túrde bosandy. Sábılerdiń anasy 30 jasta.
Tańǵy tórt shamasynda perınataldyq ortalyqtyń bilikti mamandary tez arada jumylyp, ota sátti ótti. Kesar tiligi arqyly dúnıege kelgen sátten bastap nárestelerge jedel kómek kórsetilip, jansaqtaýdan soń patologııa bólimine aýystyryldy.
Qala kúni týǵan 69 sábı men úshem – bir otbasynyń qýanyshy ǵana emes, búkil Almaty úshin úlken jańalyq. Árbir jańa ómir – erteńge degen senim, bolashaqqa degen úmit. Bul balalar qala tarıhyn jalǵastyryp, onyń keleshegin órkendeter jańa urpaq.
