Kollajdy jasaǵan – Qonysbaı ShEJIMBAI, «EQ»
Jańa Salyq kodeksine sáıkes, deklarasııa negizinde jeńildetilgen arnaıy salyq rejimi engiziledi. Bul talap tabysy 600 myń aılyq eseptik kórsetkishke (shamamen 2,4 mlrd teńge) deıingi shaǵyn jáne orta bıznes sýbektilerine arnalyp, ákimshilik júktemeni tómendetýge baǵyttalyp otyr. Iаǵnı esep tapsyrý jeńildep, atalǵan rejimge jeke kásipker retinde mindetti tirkeýsiz aýysýǵa múmkindik beriledi. Al qosylǵan qun salyǵy boıynsha mindetti tirkeý shegi 10 myń AEK-ke (shamamen 40 mln teńge) deıin azaıtyldy. Sóıtip, tóleýshiler sheńberi keńeıedi. Sondaı-aq reforma eseptilik kólemin 30%, al salyqtardy 20%-ǵa deıin azaıtýdy kózdeıdi.
«Kásipkerlerden bereshekti óndirip alýdyń neǵurlym ıkemdi ári jumsaq tártibi qarastyrylyp otyr. Eger qaryz mólsheri az bolsa, kompanııalardyń shottary avtomatty túrde buǵattalmaıdy. Bul bızneske operasııalardy toqtatpaı, qyzmetin jalǵastyrýǵa múmkindik beredi. Qatań sharalardyń ornyna aldyn ala eskertýler men habarlamalar jiberiledi. Kemshilikter tek júıeli túrde baıqalǵan jaǵdaıda ǵana kezeń-kezeńimen óndirip alý tetigi engiziledi. Mundaı qadam shaǵyn jáne orta bızneske qysymdy tómendetip, kásiporyndarǵa ornyqty jumysty isteýge jol ashady», deıdi O.Abdrahmanov
Alaıda kásipkerler qaýymdastyǵyn alańdatatyn jaıttar bar. Eń basty máseleniń biri – arnaıy salyq rejiminde jumys isteıtin kásipkerler úshin salyqtyq shegerimderdi qoldanýǵa qoıylǵan shekteýler. «Úı janyndaǵy dúkender» jelisiniń ókili Lázzat Dosmaǵambetovanyń aıtýyna qaraǵanda, bul jańa normalar shaǵyn bıznestiń damýyna aıtarlyqtaı áser etýi múmkin.
«Korporatıvtik tabys salyǵy men shegerim – mańyzdy quraldar. Biz, jeke kásipkerler, turǵyndarǵa, JShS-lerge ónim jetkizemiz. Eger jańa kodekske sáıkes iri bıznes bizden alynǵan taýarlardy shegerimge qosa almasa, olar bizben jumys isteýden bas tartady. Mundaı jaǵdaıda ónimderdi tek jeke tulǵalarǵa ǵana sata alamyz. Al bul bizdiń tabysymyzdy azaıtady», dedi L.Dosmaǵambetova.
Atyraý oblystyq kásipkerler palatasynyń dırektory Nurlan Súıinbaevtyń pikirinshe, kásipkerlerdiń alańdaýshylyǵy negizsiz emes. Sol sebepti, bıznestiń óńirdegi erekshelikterin eskerý qajet.
«Atyraý oblysynyń kásipkerleri árqashan zań aıasynda jumys isteýge umtyldy. Zańnamalyq normalar shaǵyn jáne orta bıznestiń damýyna kedergi bolmaýǵa tıis. Salyqtan jaltarýǵa qarsy kúres qajet. Alaıda adal kásipkerlerdiń ósý múmkindigi shektelmeýi kerek. Osy oraıda jańa erejelerde óńirlik erekshelikter, sonyń ishinde iri JShS-men tyǵyz jumys isteý máselesi eskerilýge tıis», deıdi ol.
Atyraý oblysy
