Kókshetaýda jylý berý maýsymy qyrkúıektiń 25-de bastalady. Shahardy jylýmen qamtamasyz etýge jaýapty «Kókshetaý jylý» kásiporny. Kúzgi-qysqy kezeńge daıyndyq aıasynda qazandyqtar men jylý júıeleri jóndeldi. Ǵabdýllın kóshesinde 100 metrdeı magıstraldy bóligindegi jumys aıaqtalýǵa jaqyn. Jylý berýge daıyn, biraq, turaqty jylý rejımin bekitý úshin ýaqyt kerek.
–Kásiporynnyń jylý kesheni eki qazandyqtan turady, – deıdi «Kókshetaý jylý» kásipornynyń bas dırektory Rýslan Mákishev, – №1 aýdandyq qazandyqta úsh gaz-mazýtty jylytý qazandyǵy tur. Qýattylyǵy 190 gıgokalorıı. Qazandyqtyń teń jartysyna jýyǵynyń tozyǵy jetken. Al ekinshi aýdandyq qazandyqta qýattylyǵy 280 gıgakalorıı bolatyn kómirtozańdy 3 qazandyq agregaty bar. Sondaı-aq kásiporynnyń quramyna jergilikti qazandyqtar men jylý júıeleri kiredi. Qos qubyrly jylý júıeleriniń uzyndyǵy 191 shaqyrym.
Qalada 5 myńnan astam abonent jylýmen qamtylady. Olardyń 1200-i kópqabatty turǵyn úı. Sonyń 65-i jylý berý maýsymyn ótkizýge daıyn emes. 8 nysanda másele shash-etekten.
–57 úı negizinen eki qabatty, tozyǵy jetken, – kókshetaý qalalyq turǵyn úı qatynastary jáne turǵyn úı ınspeksııasy bóliminiń basshysy Qýanysh Ǵazızov, – olar renovasııa tiziminde tur. Osyǵan oraı turǵyndar daıyndyq jumystaryn júrgizýge qulyqsyz. Keı úılerdiń tipti ıesi joq, sondyqtan olar tipti jylý júıelerin tazalaý isine de jıylǵysy kelmeıdi.
Jıyn barysynda bul úılerdi májbúrlep basqarýǵa usynys engizildi.
Kókshetaý
