1 qazan – halyqaralyq Qarttar kúnine oraı Semeı qalasynda saltanatty qabyldaý sharasy ótti. Qarııalarǵa qurmet kórsetýge arnalǵan jıynǵa oblys ákimi Berik Ýálı jáne óńirdiń qala-aýdandarynan ardagerler qatysty. Aımaq basshysy ardagerlerdi merekemen quttyqtap, olardyń qoǵamdaǵy orny men sińirgen eńbegine qurmet bildirdi.
«Búgin – danalyq pen parasattyń merekesi. Halqymyzda «Qartyn syılaǵan eldiń qazynasy mol» degen ulaǵatty sóz bar. Egemen elimizdiń tarıhı bastaýynda turyp, qýatty memleketti qalyptastyrýda darııa keýde, taý músin, qazynaly qarttardyń eńbegi ushan-teńiz. Qazirgi qoǵam jol kórsetip, jón silteıtin ulttyq tárbıeniń negizi bolǵan aqsaqaldarmen qundy. Sizder ónegeli ómir tájirıbesiniń qaınar kózi, bastaý bulaǵysyzdar. Memleket tarapynan el Prezıdentiniń qoldaýymen aǵa býyn ókilderine áleýmettik qoldaýdy kúsheıtý baǵytynda naqty sharalar qabyldanyp keledi. Abaı oblysynda da zeınetkerlerge jan-jaqty qoldaý kórsetý basym baǵyttardyń biri bolyp qala bermek. Atadan qalǵan amanatty urpaq boıyna sińirip, sabaqtastyqty úzbeı, qoǵam ıgiligi jolynda atqarǵan zor eńbekterińiz úshin barshańyzǵa rızashylyǵymdy bildiremin», dedi oblys ákimi.
Is-shara barysynda óńirdiń ár salasynda eńbegimen elengen ardagerler oblys ákiminiń alǵyshattarymen, respýblıkalyq Ardagerler uıymynyń tósbelgisimen marapattaldy. Aǵa býyn ókilderine shyǵarmashylyq ujymdar merekelik baǵdarlama usyndy. Jyly ráýishte ótken kezdesýde ardagerler eldiń bereke-birligi, jastardyń bolashaǵy týraly oılaryn ortaǵa saldy.
«Bıyl Memleket basshysy «Jumysshy mamandyqtar jyly» dep belgilendi. Búgingi merekege Semeı, Kýrchatov qalalarynan, oblysymyzdaǵy 10 aýdannan kezinde mehanızator, saýynshy, shopan, baqtashy bolyp jumys istegen qarapaıym eńbek adamdarynyń arnaıy shaqyrylyp, marapattalyp jatqany bizdi qýantyp otyr. Barlyq ardagerlerdiń basyn qosyp, qurmet kórsetkeni úshin ardagerler uıymy atynan úlken alǵysymdy aıtqym keledi», dedi oblystyq ardagerler keńesiniń tóraǵasy Murat Álın.
Búginde óńirde 100 myńǵa jýyq zeınet jasyndaǵy qarııa turady. 2023 jyldan bastap oblystyq máslıhat sheshimine sáıkes, jergilikti atqarýshy organdardyń bastamasymen memlekettik-jekeshelik áriptestik negizinde «Qaraǵaıly» sanatorıı-kýrorttyq emdeý ornyna zeınet jasyndaǵy azamattardy saýyqtyrý jumystary uıymdastyryldy. Nátıjesinde saýyqtyrý sharalarymen 6 myńǵa jýyq adam qamtylǵan.
Sondaı-aq aǵa býyn ókiline qurmet kórsetýden Aıakóz aýdany da qalys qalǵan joq.t Urpaqtar sabaqtastyǵyn jáne qoǵamnyń qundylyqtaryn qalyptastyratyn mańyzdy merekede KAZ Minerals Aktogay kompanııasy Aqtoǵaı kenti men Qopa aýylynyń qart turǵyndaryna aıryqsha kóńil bólip keledi. Qarttar kúnine oraı kompanııa Aqtoǵaı kenti men Qopa aýylynyń 300 qarııasyna arnaıy merekelik is-shara uıymdastyrdy.
«Qarttarǵa qamqorlyq – halqymyzdyń eń bir tárbıeli ónegesi. Bul ıgi isti uıymdastyrǵan KAZ Minerals Aktogay kompanııasyna aıyryqsha alǵys bildiremiz. Kósh erekshe kóńildi boldy. «Ájeler» ansambli án saldy, túrli jarystar uıymdastyryldy. Úlken kisilerge kúlip bergen shaı da syılyq. Sondyqtan osynaý jas urpaqtyń aǵa býyn ókilderin qurmetteýi – berekeniń belgisi», deıdi Aqtoǵaı ardagerler uıymynyń tóraıymy Gúlǵaısha Aqanqyzy.
Merekelik jıynda qarttarǵa estelik syılyqtar tabystaldy. Aǵa býyn ókilderi ózderine kórsetilgen yqylas pen qurmet úshin kompanııa basshylyǵyna erekshe alǵystaryn bildirdi.
Abaı oblysy
