Sýretti túsirgen – Esenjol ISABEK
«Eýropalyq qaıta jańartý jáne damý banki (EQDB) arqyly nesıe usyný esebinen akkýmýlıatorlyq batareıalarmen júretin ári energııa qýatyn barynsha únemdeıtin 25 jańa tramvaı satyp alý josparlanyp otyr. Jobanyń jalpy quny – 8 mlrd teńge. Qarajattyń 7 mlrd teńgesin bank berse, taǵy 1 mlrd teńgesi oblystyq bıýdjetten qarastyrylǵan. Vagondardy satyp alýǵa arnalǵan konkýrs EQDB alańynda qaralý satysynda. Qazirde 4 qatysýshydan usynystar qabyldandy. Konkýrs qorytyndysy shyǵarylǵan soń jeńimpazben tramvaılardy jetkizý merzimderi aıqyndalatyn shart jasalady», dep habarlady oblys ákiminiń baspasóz qyzmeti.
Aldaǵy jyldary tramvaı vagondary kezeń-kezeńimen jańartylyp, tıisti qarjylandyrýmen qamtamasyz etilgen jaǵdaıda «Dostyq» shaǵyn aýdanyna tramvaı jelisin uzartý kózdelgen. «Dostyqqa» tramvaı jelilerin salý jobasy memlekettik saraptamanyń oń qorytyndysyna ıe bolǵan. Qurylystyń jalpy quny – 2,1 mlrd teńge. Barlyǵy jónimen bolsa, jobany iske asyrý keler jyly bastalady. Shaǵyn aýdandaǵy boljamdy jolaýshylar aǵyny kúnine 5000 adamdy quraıdy.
Kásiporynda búginde shamamen 500 adam eńbek etedi. Ortasha eńbekaqy 350 myń teńgeni quraıdy, ony kóterý máselesi qarjylyq múmkindik sheginde qarastyrylyp jatyr.
«Tramvaı parkinen kún saıyn 83 vagon jolǵa shyǵady. Sońǵy ret park 2017–2019 jyldary jańartylyp, Belarýste shyǵarylǵan 23 vagon satyp alyndy. Jalpy, park jaǵdaıy qanaǵattanarlyq: vagondarǵa júıeli túrde aǵymdaǵy, kúrdeli jóndeý júrgiziledi, depo qajetti jabdyqtarmen tolyq qamtamasyz etilgen. Shamamen 30 tramvaı júrgizýshisi, sondaı-aq elektr slesarlar men jóndeýshiler sııaqty jumysshy mamandyqtarǵa tapshylyq bar», deıdi D.Mahmýdov atyndaǵy «Pavlodar qalasynyń tramvaı basqarmasy» AQ basqarma tóraǵasy Mýslım Mahmýdov.
Tramvaı basqarmasy kóshe qıylystaryndaǵy tramvaı joldarynyń ótkelderine de nazar aýdaryp keledi. Bıyl jeti ótkeldi jańartý josparlansa, sonyń beseýi qazirgi kúni paıdalanýǵa berilgen.
2016 jyldan munda jolaqyny elektrondyq tóleý júıesi engizilgen. Kásiporyn basshylyǵynyń aıtýynsha, qoldanystaǵy 100 teńgelik tarıf parktiń shyǵyndaryn jabýǵa jetkiliksiz. Ekonomıkalyq turǵydan alǵanda, naqty tarıf shamamen 300-320 teńgeni quraýy kerek. Biraq bul jolaýshylardyń qaltasyna salmaq salady. Sondyqtan park kútimi men eńbekaqy tóleý, ózge de shyǵystarǵa bıýdjetten sýbsıdııa tólenedi.
PAVLODAR
