Qalamger óz shyǵarmalaryn 70-jyldardyń sońynda bastap, 80-jyldary qarqyndy jaza tússe de, oqyrmandy eń aldymen «Nobel syılyǵy dál qaı eńbegine berildi?» deıtin suraq mazalaıtyny ras. Bul saýalǵa nobelprize.org resmı saıty «Marapat onyń apokalıptıkalyq terrordyń ishinde ónerdiń qudiretin kórsetetin kórkem de kóregen shyǵarmashylyǵy úshin berildi», dep jaýap jazdy. Buǵan qosa Nobel marapatyn taǵaıyndaıtyn uıym derek kózderinde sý jańa laýreatty Ortalyq Eýropa dástúrindegi kórnekti epıkalyq jazýshy retinde
sıpattaǵan.
Ol 1954 jyly 5 qańtarda dúnıege kelgen. Zańger kásibin ıgergen ákesi men áleýmettik qaýipsizdik salasynda jumysshy bolǵan anasy bala kezinde Laslonyń evreı tegi bar ekenin jasyrǵan kórinedi. Ákesiniń jolyn qýyp zańgerlikti oqyǵan L.Krasnahorkaı keıin til-ádebıetke bet buryp, zańǵar jazýshyǵa aınaldy.
Laslonyń qalamynan «Saıtan tangosy», «Verkmeıstr úılesimi», «Týrın jylqysy», «London adamy», «Jazyqtaǵy saıahat» sekildi birqatar týyndy týǵan. Ol negizinen kúrdeli fılosofııaǵa qurylǵan antıýtopııa janry arqyly ádebıetke jańalyq ákeldi. Endi osy baǵytqa – tereń oıǵa jeteleıtin Ortalyq Eýropa shyǵarmalaryna qyzyǵýshylyq artatyny anyq.
Aıtpaqshy, jazýshy – kóptegen eńbegin kıno tilinde sóıletýdi de sheber meńgergen kásibı kınossenarıst. Bul qabileti de ádebı týyndylardy oqyrmanǵa keńinen tanytýǵa septigin tıgizgen sekildi. Aldaǵy ýaqytta onyń shyǵarmalary qazaq tiline de aýdarylady dep úmittenemiz.
