Otyrysta senatorlar «Damýshy elderdi erekshe eskere otyryp, eń tómen jalaqyny belgileý týraly konvensııany (131-konvensııa) ratıfıkasııalaý týraly» zańdy qarap, maquldady. Talqylaý kezinde aıtylǵandaı, bul zańdy qabyldaý elimizdiń eń tómengi jalaqyny aıqyndaýǵa arnalǵan qoldanystaǵy tásilderin halyqaralyq deńgeıde bekitý jáne áleýmettik dıalogtiń quqyqtyq bazasyn nyǵaıtý jolynda aıryqsha mańyzǵa ıe.
«Damýshy elderdi erekshe eskere otyryp, eń tómen jalaqyny belgileý týraly konvensııany ratıfıkasııalaý týraly» zań elimizdiń Halyqaralyq eńbek uıymynyń múshesi retindegi mindettemelerin oryndaý maqsatymen ázirlengen. Konvensııa azamattardyń qajettilikterin jáne memlekettiń ekonomıkalyq damý deńgeıin eskere otyryp, eń tómengi jalaqyny belgileý júıesin engizýdi kózdeıdi. Sondaı-aq eń tómengi jalaqy mólsherin ýaqyt óte qaıta qaraý rásimi aıqyndaldy. Maquldanǵan zań azamattarymyzdy áleýmettik qorǵaý júıesin odan ári jetildirýge óz septigin tıgizedi dep senemiz», dedi M.Áshimbaev.
Osylaısha, kelisimdi ratıfıkasııalaý elimizdiń Halyqaralyq eńbek uıymyna múshe retindegi halyqaralyq mindettemelerge beıil ekenin rastaıdy ári eńbekaqynyń eń tómengi deńgeıin belgileý kezinde áleýmettik ádilet pen ekonomıkalyq negizdeme arasyndaǵy tepe-teńdikti qamtamasyz etedi.
Senat tóraǵasy Eńbek jáne halyqty áleýmettik qorǵaý mınıstrligin eń tómengi jalaqyny adamnyń qajettilikterine, onyń ómir súrý standarttaryna súıene otyryp belgileýge shaqyrdy. Ol vedomstvonyń birinshi vıse-mınıstrine qarata mınıstrlik qajet bolǵan jaǵdaıda azaıtý jaǵyna qaraı derbes túzete alatyn qur makroekonomıkalyq kórsetkishterden bas tartýdyń mańyzdy ekenin atap ótti.
«Sizder óz ádisterińizge súıenip, ortasha jalaqy men eńbek ónimdiligine basymdyq berip otyrsyzdar. Alaıda bul jerde konseptýaldy tásildi ózgertý týraly sóz bolyp otyr. Koeffısıentterdiń kómegimen ózderińiz túzete alatyn makroekonomıkalyq kórsetkishterge júgine bermeı, adamnyń qajettilikterine, onyń ómir súrý standarttaryna den qoıý kerek. Eń tómengi jalaqyny sonyń negizinde belgileý qajet. Biz Konvensııanyń mánin osylaı túsinemiz», dedi M.Áshimbaev Eńbek jáne halyqty áleýmettik qorǵaý birinshi vıse-mınıstri Asqarbek Ertaevqa.
Sonymen qatar Senat otyrysynda depýtattar «Qazaqstan Respýblıkasynyń Úkimeti men Qatar Memleketiniń Úkimeti arasyndaǵy Qazaqstan Respýblıkasynan kelgen jumyskerlerdi Qatar Memleketinde jumysqa ornalastyrýdy retteý týraly kelisimdi ratıfıkasııalaý týraly» zańdy qarap, maquldady. Senat tóraǵasy atap ótkendeı, zańdy qabyldaý nátıjesinde Qatar memleketine jumysqa baratyn elimizdiń azamattaryn quqyqtyq jáne áleýmettik qorǵaý qamtamasyz etiledi.
«Qaralǵan kelisim Qazaqstan azamattarynyń Qatar memleketinde jumysqa ornalasýy úshin quqyqtyq negiz qalyptastyrýdy kózdeıdi. Osy maqsatpen taraptar arasynda týyndaıtyn qatynastar jan-jaqty rettelip otyr. Atap aıtqanda, Qatar memleketinde jumys isteıtin jerlesterimizdiń jol men baspana shyǵyndary shaqyrýshy tarap esebinen óteledi. Sondaı-aq eńbek demalysymen jáne medısınalyq qyzmetpen qamtamasyz etý jumys berýshige júkteldi. Aldaǵy ýaqytta bul zań Qatar memleketinde jumys isteıtin azamattarymyzdyń quqyqtaryn tolyq qorǵaýdy qamtamasyz etýge óz úlesin qosady dep senemiz», dedi spıker.
Kelisimge Qazaqstan azamattaryn irikteý, jumysqa qabyldaý jáne ornalastyrý kezinde olardyń quqyqtaryn aıqyndaý rásimderin belgileýmen qatar qosymsha retinde Qatar memleketinde Qazaqstan Respýblıkasynan jumyskerlerdi jaldaý týraly úlgilik eńbek sharty bekitiledi. Bul qujatta jumys berýshiniń Qatar memleketiniń zańnamasyna sáıkes turǵyn úı berý nemese turýǵa járdemaqy tóleý, jumys ornyna deıin jáne keri qaraı tegin kólikpen qamtý ne kólik járdemaqysyn tóleý, medısınalyq qyzmet kórsetý jáne jyl saıynǵy demalysty qosa alǵanda, jumyskerlerdi jumyspen qamtý jónindegi mindetteri jazylady. Bul rette Qatardyń jumys berýshisi úlgilik eńbek shartyna qandaı da bir ózgerister engizýge quqyly emes ekenin aıta ketken jón.
