Sýretti túsirgen – Erlan OMAR, «EQ»
Zaýyt jumys istegen 14 jylda 500 myńǵa jýyq avtomobıl qurastyrdy. Kásiporynnan shyqqan jeńil kólikter el aýmaǵynan tys, Reseı, Qyrǵyzstan, О́zbekstan, Ázerbaıjan jáne Belarýs elderine eksporttalady.
«Álemde kólik qurastyratyn zaýyttardyń eshqaısysy bólshekterdi ózderi óndirmeıdi. Bizdiń kásiporyndaǵy jaǵdaı da soǵan uqsas. Ár kólik markasynyń tetikterin ózara kelisimshart aıasynda ártúrli sheteldik zaýyttardan aldyramyz. Bastysy, kólikter barlyq sheberhanadaǵy bilikti mamandardyń qolynan ótip, joǵary tehnologııaly qondyrǵylardyń kómegimen qurastyrylady. Negizgi maqsatymyz – halyqaralyq sapa normalaryna sáıkes keletin básekege qabiletti ónim shyǵarý», deıdi kompanııa dırektory Syrym Semeıbaev.
Byltyr maýsymda kásiporyn plastıka boıaý sehyn iske qosty. Tolyqtaı avtomattandyrylǵan jańa seh jylyna avtokólikke qajet 62 myń plastıka buıymdaryn óńdep shyǵarady. Mundaǵy ónim shyǵarý úderisin tolyqtaı avtomatty konveıerler men robottandyrylǵan qondyrǵylar atqarady. Jańa sehtyń ashylýy buǵan deıin kólik shanaǵy men plastıkalyq bólshekterdi qatar boıap kelgen negizgi boıaý sehynyń jumys júktemesin azaıtyp, CKD óndirisiniń úlesin ulǵaıtý arqyly óndiris qýatyn arttyrýǵa jol ashyp otyr. Plastıka boıaý sehynda alty robot jumys isteıdi. Mundaǵy óndiris jelisiniń ózi tórt aımaqqa bólingen. Boıaý kameralaryndaǵy jumystyń bárin robot operatorlar basqarý pýnkti arqyly baqylaıdy. Iаǵnı boıaý sehyndaǵy densaýlyqqa edáýir zııan keltiretin jumysty robot atqarady.
Búginde kásiporynda 3 800 adam jumys isteıdi. Jumysshylardyń bári tegin tamaqpen, arnaıy kıimmen qamtamasyz etilgen. Boıaý sehynyń sheberi Raýshan Baıbatjanova zaýytta on shaqty jyldan beri jumys isteıdi. Kúndelikti mindeti – boıaý sehynan jańa shyqqan kólik shanaqtarynyń syrtqy qabatyn tegistep, jyltyratý. Atalǵan sehta Raýshannan ózge jıyrma shaqty áıel bar. Bir brıgada bir aýysym ishinde jıyrmaǵa jýyq avtokólik shanaǵyn óńdep shyǵarady.
«Jumysqa qyzmettik avtobýspen kelip, qaıtamyz. Boıaý sehyndaǵy jumysymyz da qyzyq. Ádette jaı adamǵa jańa syrlanǵan avtokóliktiń syrty minsiz ári tep-tegis bolyp kórinýi múmkin. Al men syrt kózge kórinbeıtin usaq kemshilikterdi birden baıqaımyn. Shanaqtyń syrtqy tegistigin saýsaqpen sezine bilý kerek», deıdi seh sheberi.
86 myń sharshy metr aýmaqty alyp jatqan zaýytta 7 óndiristik seh jumys isteıdi. Kásiporynnyń jas maman, jańa kadrlary zaýyt janynan ashylǵan «SAP University» ortalyǵynda júıeli túrde bilim jetildirip, kásibı biliktiligin arttyrady. Zaýytta jańa tehnologııanyń tilin jetik biletin zamanaýı bilimi bar ınjener-tehnolog jastar jumys istep jatyr. Mysaly, kásiporyn mamany Arman Zákirov – «Djepıks» dep atalatyn «aqyldy» qurylǵynyń mamany. Eki jyldan beri osy qurylǵyny basqarady.
«Bul – bizdiń zaýytta ǵana bar jańa mamandyq. «Chevrolet Onix»-tiń CKD óndirisin arnaıy baǵdarlamanyń kómegimen bastan-aıaq baqylaımyn. Basty mindetim – kólik óndirisindegi sapany baqylaý. Munyń syrtynda, ár jyly shyqqan avtokólikterdiń áripteri de aýysyp otyrady. Sonyń bárin aldyn ala qadaǵalaý kerek. Mysaly, dánekerleý sehynan shyqqan avtokólik shanaǵyna pın-kod salamyz. Odan keıin avtokólik boıaý sehyna, keıin usaq torapty qurastyrý sehyna kiredi. Biz óndiris úderisinde qandaı da bir qatelik ketip qalmaý úshin olardyń port nómirlerin, barlyq málimetti aldyn ala aýystyryp, jańalap otyramyz. О́zim basqaratyn «aqyldy» qurylǵynyń tilin tolyq ıgerip aldym. Biraq munymen jumys isteý úshin kún saıyn bilim jetildirip otyrý qajet. О́ıtkeni munda san alýan júıemen jumys isteýge týra keledi. AI salasynan habardar bolýyń shart. О́tken jyldan beri 3 myńnan asa «Chevrolet Onix» avtokóligin shyǵardyq. Sol úsh myń kóliktiń tehnıkalyq sapasy, dánekerlenýi, boıalýy – bári-bári bizdiń baqylaýymyzdan ótti», deıdi jas maman.
«Allıýr» «Chevrolet Onix» óndirisin 2024 jyly iske qosqan. Joba aıasynda qarastyrylǵan ınvestısııa kólemi – shamamen 33,7 mlrd teńge.
Avtozaýyt búginde «Allur Campus» atty zamanaýı turǵyn úı keshenin salyp jatyr. Jalpy aýdany 13,5 myń sharshy metrden asatyn 9 qabatty kirpish úıde jas otbasylar turatyn 71, stýdentter turatyn 60 jáne qonaqtarǵa arnalǵan 20 bólme bar. Kampýs aýmaǵynda medısınalyq pýnkt, kitaphana, kompıýter synyby, jattyǵý zaly, kir jýatyn bólme jumys isteıtin bolady. «Allıýr» kompanııasynyń jeke qarajatyna salynyp jatqan kampýs taıaý kúnderi paıdalanýǵa beriledi dep josparlanyp otyr.
Aldaǵy ýaqytta avtozaýyt basshylyǵy «Allur Campus» aýmaǵyn keńeıtip, 260 oryndyq balabaqsha, fýtbol, basketbol alańdaryn, júgirý joldaryn, «workout» aımaǵy men ústel tennısine arnalǵan alańqaılar salýdy josparlap otyr.
Qostanaı oblysy
