Bozanbaıdaǵy bekzat óner baıqaýy

Bıylǵy dodaǵa qus kóter­gender sonaý Qytaı, Reseı, Ispanııa, Majarstan, Moń­ǵolııa, Qyrǵyzstannan kelip qatysty. Elimizdiń túkpir-túkpirinen jetken qus­be­giler qanshama. Ereje báz-baıaǵy, búrkit shyrǵaǵa túsip, iriktelgenderi qoıan alsa, qar­shyǵa, lashyn syndy qus­tar kók júzinde kepter teýip, jınalǵan jurtty tań-ta­masha etti. Rasymen qyzyq. Judyryqtaı qustyń shap­shańdyǵyna tańǵalasyń. Pyr etip ushqan kepterdi aǵyndatyp kelip tepkende burq etken mamyq qana qaldy. Al anaý tóbeden barlaı ushqan búrkit qorǵansyz qoıandy tegeýrinimen ile qonar edi. Úı qoıany ǵoı, qa­shyp úlgergenshe qanatyn qomdaı kelgen ash qyran basyp úl­geredi. Ishinara jalt berip, qu­tylǵany da, sytylǵany da bar.

Babadan kele jatqan bekzat óner baıqaýyn Bozanbaıdyń jelke tusyndaǵy Búrkit tóbede ótkizý tegin emes. 80-jyldary osy aýyldan О́zbek Ma­napov esimdi búrkitshi shyǵyp, jarty álemge áıgilense, búgingi kúnde Najıtbandar otbasy ata dástúrdi jańǵyrtyp otyr. Aýyldyń óńi ketip tur degeni bolmasa, kóginen qyrannyń sańqyly ketpegen qasıetti meken. Tabıǵaty da ásem. Sony qyzyqtap kelip jatqan saıahatshylar da az emes. Aıtqandaı, osy toıǵa oblys basshysy Nurymbet Saqtaǵanovpen birge Týrızm jáne sport mınıstri Erbol Myrzabosynov keldi. «Qusbegilik» federasııasynyń vıse-prezıdentteri Baǵdat Múp­tekeqyzy men Janjigit Omarhan da qatysty.

– Bul – oblys úshin ǵana emes, elimiz úshin mańyzy zor fes­tıval. Úsh kún boıy Búr­kit tóbe alańynyń kórkin sport­tyq básekeler qyzdyryp, qa­tysýshylar dostyq pen bir­liktiń naǵyz úlgisin kórsetti. Altaı men Tarbaǵataıdyń asqaq shyńdary men keń dalasynda qyran qus salý – ata-babamyzdan jalǵasqan kóne dástúrdiń biri. Saıatshylyq ónerdiń álem­dik deńgeıde moıyndalyp, ulttyq brendke aınala bastaýy – halqymyzdyń urpaqtan-ur­paqqa jalǵasqan baǵa jetpes mu­rasy, máńgilik qundylyq eke­nin aıǵaqtaıdy, – dedi óńir basshysy Nurymbet Saqtaǵanov.

Búrkit toıyna kelgender teńge ilý, jamby atý syndy ulttyq sport túrinen de sa­ıysqa tústi. Qyryqqa jýyq kıiz úı tigilip, qolóner sheber­leriniń kórmesi ótti. Jı­nal­ǵan jurtshylyqqa qazaq es­tra­dasynyń tanymal jul­dyz­dary Kenjebek Janábilov, Dosymjan Tańatarov syndy ánshiler men «Alataý serileri» toby ánnen shashý shashty.

– Halyqtyń peıiline, nıe­tine qaraı kún de jarqyrap turdy. Qanshama elden kelip, qazaqtyń dástúrin kórip jatyr. Ultymyzdy ulyqtaıtyn osyndaı is-shara jalǵasyn taba berse eken, – dedi belgili ánshi Kenjebek Janábilov.

Festıval qorytyndysy boıynsha ıtelgi saıysynan Aq­moladan at arytyp kelgen Erlan Kenjetaev jeńiske jet­se, qarshyǵa jáne búrkit saıys­tarynda Almatydan kelgen О́mirhan Baetbaı birinshi oryndy qanjyǵasyna bókterdi.

Shyǵys Qazaqstan oblysy,

Ulan aýdany,

Bozanbaı aýyly