Energetıkalyq jáne kommýnaldyq sektorlardy jańǵyrtý jónindegi (EKSJ) Ulttyq jobany iske asyrý boıynsha jobalyq keńseniń otyrysynda 2029 jylǵa deıingi jańǵyrtý kartasyn ázirleý, Ulttyq jobaǵa Sıfrlyq teńgeni engizý, halyqaralyq qarjy ınstıtýttaryn tartý jáne aspaptandyrýdyń qamtylýy men qajettiligin taldaý nátıjeleri qaraldy.
Kelesi jyly el boıynsha 14 myń shaqyrymnan astam ınjenerlik jelilerdi jóndeý men 8 myńnan astam jabdyqty aýystyrýǵa 1 trln teńgeden astam qarjy qajet ekeni aıqyn boldy.
Kommýnaldyq kásiporyndardyń ınvestısııalyq tartymdylyǵyn arttyrý maqsatynda olardy irilendirý boıynsha jumys júrgizilip jatyr. Memlekettik baǵaly qaǵazdar (MBQ) tetigi aıasynda tórt óńirde jylý jelileri men sý tazartý keshenderin jańǵyrtýǵa baǵyttalǵan 10 qanatqaqty jobaǵa bólingen 22,5 mlrd teńgeniń 47%-y ıgerildi.
«Báıterek» holdıngi Dúnıejúzilik bank, Eýropa qaıta qurý jáne damý banki, sondaı-aq Eksımbankpen belsendi yntymaqtastyq ornatyp, olardyń jobalardy qarjylandyrýǵa daıyn ekenin atap ótti. О́nerkásip jáne qurylys mınıstrligi óńirler boıynsha «aqyldy» esepteý aspaptaryn ornatý qajettiligin anyqtady. 3 mıllıonnan astam sý eseptegish, taǵy sonsha qarajatqa elektr energııasyn eseptegish jáne 30 myń jylý eseptegishin ornatý josparlanyp jatyr.
Otyrys barysynda Qanat Bozymbaev Ulttyq joba aıasynda ázirlenip jatqan elektrondy satyp alý platformasynyń daıyndyq deńgeıin tekserip, onyń alǵashqy 3 modýlin 1 qarashaǵa deıin iske qosýdy tapsyrdy. Sondaı-aq vıse-premer EKSJ jobalary boıynsha jyldar men óńirler boıynsha qajettilikti aıqyndap, derekterdi otandyq óndirýshilerge berýdi jáne B2B-kezdesýler ótkizýdi tapsyrdy.
Jóndeý jumystaryna qajettilikter týraly aqparat modernization.kz resmı saıtynda jáne memlekettik organdardyń ınternet-resýrstarynda jarııalanady.
