Tańǵy 07.00-de Semeı qalasyndaǵy barlyq saılaý bólimshesi jumysyn bastady. Qalada barlyǵy 129 saılaý komıssııasy uıymdastyryldy, onyń ishinde 1 aýmaqtyq jáne 128 ýchaskelik komıssııa jumys istedi. Daýys berý úderisine anaý aıtqandaı zań talaptaryn buzý nemese qolaısyz jaǵdaılar týyndaǵany týraly aqparat joq. Yń-shyńsyz tynysh ótti. Qalada qoǵamdyq kólikter saılaý ýaqyty bitkenshe tegin qatynady. Múgedektigi bar azamattardyń barlyq qajetti jaǵdaıy eskerildi, sondaı-aq oǵan eriktilerdiń kómegi uıymdastyryldy. Jastar barynsha belsendi qatysty. Olardyń kóbi alǵash ret daýys berip, óz qalasynyń bolashaǵyna beıjaı qaramaıtynyn, ózgeris pen damýǵa degen ortaq nıetin kórsetti.
Oblys ákimi Berik Ýálı qala jurtshylyǵymen birge Medısınalyq ýnıversıtette ornalasqan №93 saılaý ýchaskesine baryp, óz tańdaýyn jasady.
– Búgin – Semeı qalasy tarıhyndaǵy erekshe kún. Qala turǵyndary tuńǵysh ret óz ákimin tikeleı daýys berý arqyly saılaıdy. Bul – Memleket basshysy Qasym-Jomart Toqaev bastamashy bolǵan saıası reformalardyń naqty júzege asýynyń aıqyn kórinisi. Prezıdenttiń «Halyq únine qulaq asatyn memleket» tujyrymdamasy men basqarý júıesin demokratııalandyrý baǵytyndaǵy jańa qadamdar búginde naqty is júzinde kórinis taýyp otyr. Semeılikter, sonyń ishinde jastar men aǵa býyn ókilderi tańerteńnen beri saılaý ýchaskelerine kelip, azamattyq belsendilik tanytyp jatyr. Bul – eldegi saıası mádenıettiń ósip kele jatqanyn, halyqtyń óz qalasynyń taǵdyryna beıjaı qaramaı, jaýapkershilikpen qaraı bastaǵanyn kórsetedi. Oblys ortalyǵynyń ákimin tikeleı saılaý – turǵyndar men jergilikti bılik arasyndaǵy senimdi nyǵaıtatyn jańa dáýirdiń bastaýy, – dedi aımaq basshysy.
Al qalalyq aýmaqtyq komıssııa tóraıymy Gúljan Qýanyshevanyń aıtýynsha, qaladaǵy árbir saılaýshyǵa shaqyrý qaǵazy taratylǵan. Sonymen qatar 10 qazanda saǵat 09.00-de saılaýshylardyń baılanys nómirlerine SMS-habarlama joldanǵan.
– Bıylǵy saılaýdyń erekshelikteriniń biri – alǵash ret Braıl qarpin biletin 40 azamatqa arnaıy osy formatta shaqyrý qaǵazdary jiberildi. Bul azamattar da óz saılaý bólimderine baryp, daýys berdi. Jalpy barlyq ýchaskede saılaýshylardyń joǵary belsendiligi baıqaldy, – deıdi ol.
Saılaýǵa sarbazdar da qatysty. Semeıdegi 36803 áskerı bóliminiń sarbazdary №132 saılaý bólimshesine kelip, daýys berdi. Abaı garnızonynyń qolbasshylyǵy saılaý naýqany kezinde sarbazdarǵa qajetti jaǵdaı jasap, olardyń quqyqtarynyń júzege asýyna kómektesti. Sonymen qatar «Elimaı» fýtbol klýbynyń sportshylardy da qaz-qatar otyryp, saılaý da óz daýystaryn berdi. Bul da naýqannyń ajaryn kirgizgeni ras.
Saılaý barysyn saıası partııalar, qoǵamdyq birlestikter men táýelsiz baqylaýshylar qadaǵalady. Olardyń sózine sensek, daýys berý qoldanystaǵy zańnama talaptaryna saı ótti, al ashyqtyq pen jarııalylyq joǵary deńgeıde qamtamasyz etildi.
Zań talabyna sáıkes, saılaý qorytyndysy úsh kún ishinde jarııalanýǵa tıis. Osyǵan oraı aýmaqtyq saılaý komıssııasynyń 2025 jyldyń 12 qazanda ótken Abaı oblysy Semeı qalasynyń ákimin saılaý qorytyndysy keshe aıqyn boldy. Aýmaqtyq saılaý komıssııasynyń málimetinshe, qaladaǵy saılaýshylar sany – 220 761. Onyń 53,7%-y saılaýǵa qatysty (118 553 saılaýshy). Úı-jaıdan tys daýys bergender – 2 548 adam (saılaýǵa qatysqan saılaýshylardyń – 2,15%), onyń ishinde 459 saılaýshy ártúrli sanattaǵy múgedektigi bar azamattar (18,01%). Jaramsyz bıýlletender sany – 2 482, «Barlyǵyna qarsymyn» jolynda belgisi bar – 4 310. Ár kandıdat úshin berilgen daýystar sany – 111 761 adam. Daýys berý qorytyndysy nátıjesi: Bekjasarov Aıbolat Qaırkeshulyna – 8,4% (9 763-daýys); Tóleýov Qanysh Maqsutulyna – 10,8 % (12 557 – daýys); Qojanbaev Ádilet Nursaǵatuly – 77,1% (89 441-daýys) saılaýshy daýys bergen. Budan soń Abaı oblysy Semeı qalasynyń ákimin saılaý qorytyndylary týraly Semeı qalasynyń aýmaqtyq saılaý komıssııasynyń sheshimi shyqty.
Saılaý týraly jáne Konstıtýsııa talaptaryna sáıkes, «1980 jyly týǵan, Abaı oblysy Kókpekti aýdanynyń ákimi qyzmetin atqarǵan Kókpekti aýylynda turatyn Qojanbaev Ádilet Nursaǵatuly Abaı oblysy Semeı qalasynyń ákimi bolyp tirkelsin», delingen.
Abaı oblysy
