Konferensııada Ǵylym jáne joǵary bilim mınıstri Saıasat Nurbek «AI-ready nation: Qazaqstan tájirıbesi» taqyrybynda baıandama jasap, elimizde jasandy ıntellekt ekojúıesi belsendi damyp jatqanyn atap ótti. Mınıstrdiń aıtýynsha, elimizde jasandy ıntellekti bilim berý júıesine, ekonomıkaǵa jáne memlekettik basqarýǵa ıntegrasııalaýǵa baǵyttalǵan saıasat pen ınfraqurylym qalyptasyp keledi. Aıtýynsha, jańa oqý jylynyń basynan bastap birqatar qazaqstandyq joǵary oqý oryndarynda jasandy ıntellekt tehnologııalaryn oqý úderisine engizýge jáne bilim sapasyn arttyrýǵa baǵyttalǵan OpenAI kompanııasynyń ChatGPT Edu bilim berý modelin engizý boıynsha pılottyq joba júzege asyp jatyr. Halyqaralyq «Qazaq tili» qoǵamymen seriktestikte ChatGPT platformasynyń memlekettik tildegi fýnksıonalyn jetildirý jumystary júrgizilýde. Ásirese, Qazaqstannyń tarıhı murasy men mádenıetine qatysty jaýaptardyń naqtylyǵy men shynaıylyǵyn arttyrýǵa erekshe nazar aýdarylyp otyr.
Konferensııaǵa Qazaqstannyń Koreıa Respýblıkasyndaǵy Tótenshe jáne ókiletti elshisi Nurǵalı Arystanov, sondaı-aq «Semeı medısına ýnıversıteti», «Azamattyq avıasııa akademııasy», Safı О́tebaev atyndaǵy Atyraý munaı jáne gaz ýnıversıteti, Qonaev ýnıversıteti, Almaty Management University sııaqty elimizdiń jetekshi joǵary oqý oryndarynyń ókilderi qatysty.
Konferensııada sóz alǵan Almaty Management University negizin qalaýshy jáne rektory, Halyqaralyq ýnıversıtet prezıdentteri qaýymdastyǵynyń atqarýshy komıtetiniń múshesi Asylbek Qojahmetov «Zertteýler men turaqty qarjylandyrý arqyly ınnovasııalardy damytý» sessııasynda baıandama jasap, «Búginde Qazaqstan zamanaýı ekonomıkany birizdi túrde qalyptastyryp keledi - bul ýaqytsha úrdis emes, sanaly jáne strategııalyq qajettilik. Sońǵy alty jylda elimizde ǵylymdy memlekettik qarjylandyrý kólemi alty ese artty, bul óz nátıjesin berip otyr. Ýnıversıtterde júrgizilip jatqan zertteýler ǵylymǵa salynǵan ınvestısııalar kólemi men otandyq ǵalymdardyń jarııalanymdyq belsendiliginiń artýy arasynda tikeleı baılanys bar ekenin dáleldeıdi» dep atap ótti.
Konferensııa aıasynda Koreıanyń Seoul Cyber University, Youngsan University jáne Bangladeshtiń Daffodil International University sııaqty sheteldik ýnıversıtettermen yntymaqtastyq týraly memorandýmǵa qol qoıyldy. Kelisimder akademııalyq utqyrlyqty damytýǵa, birlesken ǵylymı zertteýler júrgizýge jáne ınnovasııalyq bilim berý tehnologııalaryn engizýge baǵyttalǵan.
IAUP óńirlik konferensııasy keler jyly Almaty qalasynda ótedi.
ALMATY
