Qoǵamdyq baıqaýdyń róli týraly sóz

Keshe elordada «QR Prezıdentiniń kezekten tys saılaýyn qoǵamdyq baıqaýdyń róli: demokratııalyq konsept» degen taqyrypta semınar-trenıng ótti. Sharanyń ótýine Saılaýdy baıqaý jónindegi respýblıkalyq qoǵamdyq komıssııa (SBRQK) muryndyq bolypty. Semınar-trenıng saılaýdy qoǵamdyq baıqaý prosesine ázirlikti pysyqtap alý úshin jáne SBRQK músheleri, sondaı-aq óńirlik ókilderi jáne saılaýdy baıqaýshylar úshin ótkizilip otyrǵandyǵyn aıta ketken jón. Onyń jumysyna Ortalyq saılaý komıssııasynyń, Syrtqy ister mınıstrliginiń, Bas prokýratýranyń ókilderi men qoǵamdyq uıymdardyń músheleri jáne sarapshylar qatysty. Ortalyq saılaý komıssııasynyń múshesi Lázzat Súleımenova jergilikti jerlerdegi saılaý komıssııalarymen jumysqa qatysty oılarymen bólisti. «Saılaý ımıdjin qalyptastyrýda qoǵamdyq birlestikterdiń orny erekshe. Elimizdiń saılaý zańnamalaryn saqtap, saılaý naýqanyna belsendi aralasatyn bolasyzdar», dedi Lázzat Jańylysqyzy. OSK múshesiniń málimetine qaraǵanda, 9,5 mıllıon adam saılaýshylar tizimine engiziletin bolady. Bul oraıda 10 myńdaı ortalyq, aýmaqtyq jáne ýchaskelik saılaý komıssııalary tirkelgen. Qoǵamdyq birlestikterdiń baıqaýshylary barlyq saılaý komıssııalarymen jumys isteıtini belgili bolyp otyr. Bul rette baıqaýshynyń ókilettiligi jazbasha túrde aty-jónimen tolyq jazylyp, mórlengen bolýy tıis. Sonymen qatar, onyń jeke kýáligi bolýy tıistigi de alǵa tartyldy. Shara barysynda baıqaýshylardyń saılaý prosesindegi sheshýshi róli de erekshe ataldy. Budan basqa Ortalyq saılaý komıssııasynyń baıqaýshylarmen ózara is-qımyly, baıqaý prosesinde aqparattyq tehnologııalardy qoldaný máseleleri de nazardan tys qalǵan joq. Saılaýdyń halyqaralyq standarttary men 2011 jáne 2012 jyldardaǵy saılaý naýqanynda Saılaýdy baıqaý jónindegi respýblıkalyq qoǵamdyq komıssııasynyń qyzmet tájirıbesin taldaýǵa da erekshe kóńil bólindi. Asqar TURAPBAIULY, «Egemen Qazaqstan».