Foto: informburo_kz
«Kapıtan Baıtasov» — shynaıy oqıǵa negizinde túsirilgen kórkem týyndy. Fılm 2011 jyldyń 12 qarashasynda Taraz qalasynda bolǵan qaıǵyly jaǵdaıdy beıneleıdi. Sol kúni polısııa kapıtany Ǵazız Baıtasov óz ómirin qurban etip, lańkesti toqtatyp, beıbit turǵyndardy ajaldan aman alyp qalǵan.
Batyrdyń bul erligi el jadynda máńgi saqtalyp, otansúıgishtiktiń, azamattyq paryz ben adaldyqtyń úlgisine aınaldy. Erligi úshin Ǵazız Baıtasovqa «Halyq qaharmany» ataǵy berilgen. Ol ishki ister organdarynda jıyrma jylǵa jýyq qyzmet etken.
Fılmdi «Qazaqfılm» kınostýdııasy Mádenıet jáne aqparat mınıstrliginiń tapsyrysy boıynsha túsirgen. Kartına patrıotızm, azamattyq borysh jáne quqyq qorǵaý qyzmetkerleriniń qaharmandyǵy taqyryptaryn ashady.
Kórkem týyndynyń rejısseri — Daýren Qamshybaev. Basty rólderdi belgili akterler Azamat Satybaldy, Erkebulan Daıyrov, Asan Majıt, Darhan Súleımenov, Qobylandy Bolat jáne «Kann» júldegeri Samal Eslıamova somdaıdy.
Drama men ekshn janrlaryn toǵystyrǵan «Kapıtan Baıtasov» kórermenge tereń oı men rýhanı áser syılaıtyn, erlik pen adamgershiliktiń shynaıy beınesin kórsetetin týyndy bolmaq.
