Etnosaralyq yntymaqty nyǵaıtý baǵytynda uzaq jyldar boıy qalyptasqan tájirıbeniń arqasynda elimizde etnosaralyq kelisim jónindegi memlekettik saıasatty iske asyrýdyń tıimdi ınstıtýttyq júıesi qalyptasty. Bul júıe ortalyq memlekettik organdardan bastap óńirlik Qazaqstan halqy Assambleıalaryna deıin barlyq deńgeıde jumys isteıdi.
Mádenıet jáne aqparat mınıstrliginiń málimetinshe, etnosaralyq qatynastardyń damý deńgeıin zerdeleý men tájirıbelik usynymdar ázirleý maqsatynda óńirlerde turaqty túrde áleýmettik zertteýler men monıtorıngtik saparlar uıymdastyrylyp keledi. Sonyń arqasynda bıylǵy derek boıynsha turǵyndardyń 95 paıyzdan astamy eldegi etnosaralyq ahýaldy turaqty ári qolaıly dep baǵalaıtyny anyqtalyp otyr.
«2022 jylǵy sáýirden bastap kásibı etnomedıatorlardy daıarlaý jáne medıasııa ınstıtýtyn damytý maqsatynda Etnomedıasııa ortalyǵy jumys isteıdi. Etnosaralyq salada túsindirý jumystaryn kúsheıtý úshin respýblıkalyq aqparattyq-túsindirý toby quryldy. Qazirgi ýaqytta elimizde 80 aqparattyq-túsindirý toby belsendi qyzmet atqaryp jatyr. Qazaqstan halqy Assambleıasynyń bastamasymen 1000-nan astam etnomádenı birlestik pen 4000-ǵa jýyq qoǵamdyq qurylym biriktirilgen. Olardyń qyzmetine 50 myńnan astam azamat tartylǵan. Qoǵamdyq ómirge halyqty keńinen jumyldyrýda «Aqsaqaldar keńesi» men «Analar keńesi» mańyzdy ról atqarady. Otbasylyq qundylyqtardy nyǵaıtý jáne jastardy rýhanı-adamgershilik turǵydan tárbıeleýge baǵyttalǵan «Mádenıetti ana – mádenıetti ult», «Adal azamat» jáne «Salaýatty sana» jobalary tabysty júzege asyrylyp keledi» delingen mınıstrlik málimetinde.
Aıta keteıik, bıyl alǵash ret Almaty, Jambyl, Túrkistan jáne Jetisý oblystarynda aýdandyq deńgeıdegi assambleıalar qurylǵan edi. Al «Assambleıa jastary» jastar qanaty 10 myńnan astam jas ókilin biriktirip, mádenıetter arasyndaǵy dıalogti damytýǵa baǵyttalǵan bastamalardy iske asyrady. Jastar uıymynyń «Jańa tolqyn», «Shkola lıderov ANK» jáne «50 jas kóshbasshy» sııaqty jobalary tabysty júzege asyp jatyr. Sonymen qatar elimizdiń joǵary oqý oryndarynda túrli etnos ókilderimen jumys júrgizetin Stýdenttik assambleıa qurylǵan. Ol etnosaralyq kelisim men azamattyq biregeılikti nyǵaıtýǵa, sondaı-aq volonterlik qozǵalys pen etnomedıasııa baǵytyn damytýǵa óz úlesin qosyp júr.
Búginde elimizde 32 Dostyq úıi bar. Bıyl Qyzylorda, Atyraý, Abaı oblystarynda jańa Dostyq úıleriniń qurylysy bastaldy. Buǵan qosa «Jomart jan» qaıyrymdylyq ortalyǵy, «Jeńis birlikte» sporttyq alańy, «Eltaný» jobasy belsendi túrde damyp keledi. Jyl basynan beri «Jomart jan» ortalyǵynyń mesenattary 35 myń azamatqa 305 mıllıon teńge kóleminde kómek kórsetti.
Ǵylym men bilimdi damytý maqsatynda joǵary oqý oryndarynda Assambleıanyń 42 kafedrasy jumys isteıdi. 360 sarapshyny biriktiretin Ǵylymı-saraptamalyq keńes pen Jas ǵalymdar klýby zertteý qyzmetin jandandyryp jatyr.
Medıa salasynda 11 tilde 50-den astam gazet pen jýrnal jaryq kóredi. Alǵash ret elimizdiń 14 joǵary oqý ornynda oqý baǵdarlamasyna «Etnosaıası saýattylyq» kýrsy engizildi. QHA jýrnalıster klýby 500-ge jýyq BAQ ókilderi men medıa salasynyń mamandaryn biriktiredi.
Assambleıanyń 170-ten astam ansambldi qamtıtyn shyǵarmashylyq ujymdary qaýymdastyǵy quryldy. Sonymen qatar 4 etnokonfessııalyq teatr jumys isteıdi, mádenı is-sharalardyń biryńǵaı kúntizbesi júzege asyrylyp jatyr.
2023 jyly ádebıet, jýrnalıstıka, mádenıet jáne óner salasyndaǵy jetistikter úshin arnaıy syılyqtar taǵaıyndaldy. Sondaı-aq jalpyulttyq birlikti nyǵaıtýǵa qosqan aıryqsha úlesi úshin «El birligi» ordenimen marapattaý tártibi bekitildi.
Elimizdiń etnosaralyq kelisim tájirıbesi halyqaralyq arenada joǵary baǵalanatynyn aıta keteıik. QHA janynda elimizdiń beıbitshilik modelin shetelde ilgeriletýge baǵyttalǵan Halyq dıplomatııasy ortalyǵy jáne Dostyq elshiler korpýsy jumys isteıdi. Al «Assambleıa jastary» uıymy IýNESKO men Eýropa Keńesiniń halyqaralyq jastar qurylymdaryna múshe bolyp, óz bastamalaryn Parıjdegi IýNESKO shtab-páterinde tanystyrdy.
Bıyl atap ótilgen Qazaqstan halqy Assambleıasynyń 30 jyldyǵy eń mańyzdy oqıǵalardyń biri bolǵany belgili. Mereıtoı aıasynda 10 myńnan astam áleýmettik mańyzy bar is-shara uıymdastyrylyp, oǵan mıllıonnan astam adam qatysty.
